Ба ҳукумати Тоҷикистон то ҳол лоиҳаи шартнома дар бораи аломатгузоррӣ ва таъйини қисмате аз хатти сарҳади давлатӣ бо Қирғизистон дар масофаи ҳудуди 520 километр пешниҳод нашудааст ва ин ҳам дар ҳолест, ки рӯзи ҷумъаи ҳафтаи гузашта ҳукумати Қирғизистон ин лоиҳаро маъқул шуморид.
«Доир ба ин масъала мо алҳол ҳеҷ қароре қабул накардаем ва аз ин рӯ ба ҳукумат ҳам чизе пешниҳод нашудааст», – иброз дошт зимни нишасти хабарӣ раиси Кумитаи давлатии идоракунии замин ва геодезияи Тоҷикистон Акбар Ятимзода.
Ба гуфтаи ӯ, гурӯҳи кории ҳарду кишвар корҳои аломатгузорӣ ва таъйини сарҳад бо Қирғизистон дар масофаи 519,9 километрро анҷом доданд. «Дар ин масофа баъзе қитъаҳои баҳсӣ мавҷуданд. Мо ба пешниҳоди маводи таҳияшуда ҷиҳати баррасӣ ба ҳукумат омодагӣ мегирем», – гуфт Ятимзода ва илова намуд, ки алҳол «санадҳои зарурӣ» аз ҷониби гурӯҳи кории кишварҳо маъкул шуморида нашудаанд, то ки онҳо ба баррасии комиссияи байниҳукуматӣ оид ба таъйин ва аломатгузории сарҳади давлатии Тоҷикистону Қирғизистон пешниҳод карда шаванд.
«Ҳаллу фасли ин масъала хеле душвор аст, ҷонибҳо машғули коранд ва ман бовар дорам, ки дар гуфтушунидҳои минбаъда корҳо дар ин самт идома меёбанд», – афзуд ӯ.
Қобили зикр аст, ки дар ҷаласаи рӯзи 15 январи ҳукумати Қирғизистон лоиҳаи шартнома дар бораи аломатгузорӣ дар қисмате аз сарҳади давлатӣ бо Тоҷикистон дар масофаи ҳудуди 520 километр
маъқул шуморида шуд
. Дар ин бора
хадамоти матбуоти
ҳукумати Қирғизистон хабар медиҳад.
