Вазири корҳои дохилӣ генерал-лейтенанти милитсия Раҳимзода Рамазон Ҳамро рӯзи 18 январ бо сафири Ҷумҳурии Ҳиндустон дар Ҷумҳурии Тоҷикистон ҷаноби Бираҷа Прасад мулоқот анҷом дод.
Бино ба иттилои дафтари матбуоти ВКД Тоҷикистон, зимни мулоқот Рамазон Раҳимзода зикр кард, ки «Тоҷикистон ва Ҳиндустон мардумони дорои фарҳанг ва маданияти кӯҳан буда, байни ду давлат робитаҳои дӯстӣ ва ҳамкориҳои дуҷониба хуб ба роҳ монда шудаанд. Ҳамкориҳо дар доираи шартномаҳои дуҷониба ва бисёрҷонибаи баимзорасида, сол аз сол инкишоф меёбанд.
Дар соли 2001 Созишнома дар бораи ёрии ҳуқуқии байниҳамдигарӣ миёни Ҷумҳурии Тоҷикистон ва Ҷумҳурии Ҳиндустон оид ба парвандаҳои ҷиноятӣ ба имзо расидааст. Созишномаи мазкур ҳамкориҳоро дар мубориза бо ҷинояткорӣ, бахусус зидди терроризм, инчунин дар самтҳои мубодилаи иттилоот, иҷрои дархостҳо ва қарорҳо дар бораи гузаронидани кофтуков пешбинӣ менамояд.
Вазъияти сиёсӣ-ҷамъиятии имрӯзаи ҷаҳон моро водор месозад, ки дар якҷоягӣ бар зидди ҷинояткорӣ ва хатару таҳдидҳои ҷаҳони муосир муборизаи беамон барем».
Дар навбати худ ҷаноби Бираҷа Прасад изҳор дошт, ки «Мо ҳам ҷонибдори ҳамкориҳои васеъ ва ҳадафманди кишварҳоямон ҳастем ва омодаем, ки баҳри тақвияти онҳо дар ҳама самтҳо кӯшишҳои пайваста ба харҷ диҳем».
Дар идомаи вохӯрӣ ҷонибҳо оид ба масъалаҳои мубориза бо терроризм, экстремизм, гардиши ғайриқонунии маводи мухаддир, силоҳ ва дигар масоили мубрами рӯз табодули афкор намуданд.
