Имсол дар Тоҷикистон моҳи мубораки Рамазон аз 6 июн шурӯъ мешавад. Дар ин бора ба «Азия-Плюс» аз Маркази исломии Тоҷикистон хабар доданд.
Бино ба иттилои манбаъ, мувофиқи солшумории мусалмонӣ рӯзи нав на дар нимашаб, чуноне ки дар тақвими григорианӣ омадааст, балки дарҳол баъди ғуруби офтоб оғоз мегардад. Аз ин рӯ, намози якуми таровеҳ, ки иловатан дар моҳи рамазон хонда мешавад, маҳз шоми 5 июн доир мегардад.
Ба иттилои манбаъ, ба наздикӣ бояд ҷаласаи Шӯрои улмао доир гардида, дар он ҷадвали намозҳо барои моҳи Рамазон муайян карда мешавад.
Ёдрас мекунем, ки соли гузашта ҳаҷми садақаи фитр (хайрия) 4 сомонӣ барои 1 моҳ ба 1 нафар муқаррар шуда буд. Тибқи шариати ислом, ин маблағ бо назардошти нархи миёнаи ду кило орд муқаррар карда мешавад.
Моҳи шарифи Рамазон аз моҳҳои солшумории ҳиҷрии қамарӣ шуморида мешавад. Мусулмонон дар ин моҳ рӯза гирифта, бештар ба ибодат ва қироати Қуръон машғул мешаванд. Моҳи рамазон бо Ид ул-Фитр ё Иди Рамазон ба анҷом мерасад.
Рӯзи ид баъд аз супурдани фитри рӯза ва адои намози идона, мардум ба зиёрати хешовандону наздикон ва иддае барои фотеҳахонӣ сари мадфани гузаштагони худ мераванд. Баҳри пешвози меҳмонон дар хонаводаҳо дастурхони идона густурда шуда, кӯдакон низ бо табрикот ба хонаҳо мераванд ва ба онҳо дастовезҳои идона дода мешавад.
