Хадамоти матбуоти Сарраёсати Қушӯнҳои сарҳадии КДАМ Тоҷикистон
маълумоти
робита доштани шаҳрвандони Афғонистон ба ҳаракати Толибонро рад мекунад. Ин шаҳрвандони кишвари ҳамсоя рӯзи 21 август марзи давлатиро ғайриқонунӣ гузаштанӣ буданд.
Раддияи Сарраёсати Қушӯнҳои сарҳадии КДАМ Тоҷикистонро дар зер манзуратон мегардонем:
«Тавре Маркази матбуоти Қӯшунҳои сарҳадии КДАМ ҶТ қаблан иттилоъ дода буд, соати 02.00-и 21-уми августи соли ҷорӣ, зимни амалиёти муштараки марзбонони тоҷик ва Шӯъбаи КДАМ ҶТ дар минтақаи сарҳадии «Сайёд»-и ноҳияи Ҳамадонии вилояти Хатлон, убури ғайриқонунии сарҳадии давлатӣ аз ҷониби гурӯхи 9-нафараи қочоқчиёни афғон, ки кӯшиши интиқоли маводи мухаддирро ба Ҷумҳурии Тоҷикистон доштанд, пешгирӣ гардид.
Ҳангоми азназаргузаронии ҷойи ҳодиса, ҷасади ду қочоқчии афғон ёфт гардида, 1 адад силоҳи оташфишони АКМ-7,62, 6 адад тирдон бо 180 дона тири қутраш 7,62, 1 дона норинҷаки РГД-5 мусодира карда шуд. Ҷасадҳо расман ба намояндагии мақомоти сарҳадии ҶИА баргардонида шуданд. Нисбат ба ҳодисаи мазкур парвандаи ҷиноятӣ оғоз гардида, тафтишот идома дорад.
Мутаассифона, хабари мазкурро баъзе расонаҳо, аз ҷумла “Азия-Плюс”, “Озодагон”, “Авеста”, “Тоҷикистон”, “Спутник” ва ғайра, ба таври ғалат шарҳ дода, кочоқчиёни безараргардонидашударо ба ҷангиёни гурӯҳи Толибон нисбат додаанд.
Маркази матбуоти Қӯшунҳои сарҳадии КДАМ ҶТ бо тамоми масъулият изҳор медорад, ки амалиёти мазкур танҳо як ҳодисаи пешгирии кирдори ҷинояткоронаи қочоқчиён буд.
Дар робита бо ин, аз кулли расонаҳо бо ҷиддият тақозо мегардад, ки минбаъда зимни истифодабарӣ аз хабарҳои Маркази матбуоти Қӯшунҳои сарҳадии КДАМ ҶТ ба сӯистифода ва таҳрифи маълумоти расмӣ роҳ надиҳанд».
Дар ҳамин ҳол, дар иттилоияи рӯзи 22 август интишоршудаи хадамоти матбуоти Сарраёсати Қушӯнҳои сарҳадии КДАМ Тоҷикистон зикр гардида буд, ки ду қочоқбари кушташуда аъзои гурӯҳи террористии Толибон буда, ба яке аз гурӯҳи фаъолони қочоқчии афғон Турак шомил будаанд.
Дар зер нусхаи иттилоияи хадамоти матбуоти Сарраёсати Қушӯнҳои сарҳадии КДАМ Тоҷикистон бо имзои сардори хадамот М.Улуғхоҷаевро манзуратон мегардонем, ки тариқи почтаи электронӣ ба идораи мо расида буд.
