Вазири корҳои хориҷии Тоҷикистон Сироҷидин Аслов Директори минтақавии Намояндагии Созмони байналмилалии муҳоҷират (СБМ) барои кишварҳои Аврупои Шарқӣ, Ҷанубу Шарқӣ ва Осиёи Марказӣ хонум Аргентина Сабадошро ба ҳузур пазируфт.
Бино ба иттилои Вазорати корҳои хориҷии ҷумҳурӣ, зимни мулоқот вазъи кунунӣ ва дурнамои рушди ҳамкориҳои Ҷумҳурии Тоҷикистон бо СБМ дар соҳаи муҳоҷират, амалисозии барномаву лоиҳаҳои муштарак ва нақшаҳои минбаъдаи созмон дар Тоҷикистон мавриди баррасӣ қарор гирифтанд.
Гуфта мешавад, ҷонибҳо инчунин дар атрофи масъалаҳои марбут ба танзими муҳоҷирати меҳнатӣ, аз ҷумла ҳуқуқ ва масъулияти муҳоҷирони меҳнатӣ ва ҳимояи иҷтимоии онҳо табодули назар карданд.
