Ҳизби халқии демократии Тоҷикистон аз охири моҳи август то аввали моҳи сентябр аксияи хайрияи умумиҷумҳуриявии «Нури маърифат»-ро роҳандозӣ намудааст.
Усмон Солеҳ, мудири шӯъбаи таблиғот, иттилоот ва матбуоти Дастгоҳи Кумитаи иҷроияи марказии ҲХДТ ба «Азия-Плюс» дар ин робита иттилоъ дод, ки дар доираи чорабинии мазкур ҳамаи ташкилотҳои ибтидоии ҳизб дар вилоят ва шаҳру навоҳии кишвар ба омодагии кӯдакони ятим, кӯдакони имконияташон маҳдуд ва кӯдакон аз оилаҳои камбизоат ба соли нави хониш мусоидат мекунанд.
Ба гуфтаи ӯ, дар ҳар як шаҳру ноҳия на камтар аз 20 нафар кӯдакон аз ин қишри аҳолӣ ба аксия фаро гирифта шуда, онҳо бо сарулибоси мактабӣ ва дигар асбобу лавозимоти зарурии дарсӣ таъмин карда мешаванд.
Ҳизби халқии демократии Тоҷикистон соли 1994 таъсис ёфта, айни замон шумори аъзои он 480 ҳазор нафарро ташкил медиҳад, ки наздики 40%-и онҳо ҷавононанд. Раиси ҳизб президенти Тоҷикистон Эмомалӣ Раҳмон аст. Аксари аъзои ҳукумат, вакилони палатаи поёнии парлумон ва маҷлисҳои маҳаллии вакилони халқи вилоят ва шаҳру навоҳии ҷумҳурӣ аъзои ҲХДТ мебошанд.
