Ба муносибати 25-умин солгарди ҷашни Истиқлолияти давлатии Тоҷикистон рӯзи 9 сентябр дар шаҳри Душанбе раҳпаймоии оммавии сокинони пойтахт доир мегардад, ки дар он иштироки ҳудуди 60 ҳазор нафар дар назар аст.
Тавре ба «Азия-Плюс» як манбаъ аз ҳукумати ҷумҳурӣ иттилоъ дод, иштирокчиёни раҳпаймоии идона аз майдони «Дӯстӣ» гузашта, онҳоро раҳбарияти олии кишвар шодбош хоҳад гуфт.
Айни замон иштирокчиёни раҳпаймоӣ дар маҳаллаҳои гуногуни шаҳр, майдонҳои мактабҳои олӣ ва техникуму коллеҷҳо омодагӣ мегиранд.
Манбаъ аз эҳтимол дур намедонад, ки дар робита ба раҳпаймоии оммавии идона дар майдони асосии кишвар, шояд гузашти низомии ба санаи 9 сентябр таъиншуда бо ҳузури 16 ҳазор сарбозону афсарони гарнизони Душанбе ба рӯзи 8 сентябр гузаронда шавад.
«Ҳамчунин аз эҳтимол дур нест, ки раҳпаймоии идона санаи 9 сентябр баъди анҷоми гузаштпи низомӣ доир мегардад. Алҳол ин масъала комилан ҳаллу фасл нашудааст», – иброз дошт манбаъ ва илова кард, ки дар гузашти низомии қарибулвуқӯъ авиатсия ва техникаи ҳарбӣ сафарбар намешавад.
