Муовини нахуствазири Ӯзбекистон Рустам Азимов баъди марги президенти Ӯзбекистон Ислом Каримов, ки алҳол тибқи маълумоти тасдиқнашуда рӯзи 29 август аз олам даргузаштааст, ба ҳабс гирифта шудааст. Дар ин бораи васоити ахбори умум хабар медиҳанд.
Як манбаъи аз ин масъала огаҳи АИ REGNUM иттилоъ додааст, ки Азимов таҳти ҳабси хонагӣ қарор дорад. Азимовро яке аз ворисони асосии Ислом Каримов дар мансаби раисҷумҳури Ӯзбекистон ном мебурданд.
Рустам Азимов соли 2000-ум муовини нахуствазири Ӯзбекистон таъин шуда, ба масъалаҳои бахши иқтисоди ҳукумати ин кишвар масъул аст. Ҳамзамон дар мансабҳои вазири молия ва вазири иқтисод ва омори Ӯзбекистон низ ифои вазифа мекард.
Рустам Азмимов ҳамраиси Комиссияи байниҳукуматӣ оид ба ҳамкории иқтисодӣ ва тиҷоратии Тоҷикистону Ӯзбекистон мебошад.
Ёдрас мекунем, ки қаблан хабаргузории «Фергана» доир ба марги президенти Ӯзбекистон Ислом Каримов дар синни 79-солагӣ дар шаҳри Тошканд иттилоъ дода буд.
Дар ҳамин ҳол, манобеи хабаргузориҳои «Интерфакс» ва РИА «Новости» ин хабарро рад кардаанд.
Аллакай субҳи рӯзи душанбе, 29 август яке аз духтарони Ислом Каримов Лола Каримова дар инстаграми худ тасдиқ намуд, ки президенти Ӯзбекистон дарвоқеъ ҳам пас аз хунравӣ ба майнаи сар дар шуъбаи эҳёгарии бемористон бистарӣ буда, вазъи солимиаш устувор арзёбӣ мешавад.
Дар ҳамин ҳол, ВАО аллакай аз ворисони президенти Ӯзбекистон ном мебаранд. Коршиносон бар ин назаранд, ки ба ҷойи Ислом Каримов нахуствазири Ӯзбекистон Шавкат Мирзиёев ва муовини нахуствазир Рустам Азимов президенти Ӯзбекистон шуда метавонанд, хабар медиҳад РБК.
Коршиносони Пажӯҳишгоҳи ташхиси иқтисодии байнулмилалӣ (МИПЭ) хотиррасон кардаанд, ки Мирзиёев ва Азимов муддати солҳои тӯлонӣ паҳлӯи президент қарор дошта, бозигарони асосӣ зимни интихоби ворис оилаи президент, намояндагони сохторҳои қудратӣ ва қабила ё гурӯҳҳои минтақавӣ мебошанд.
Мувофиқи конститутсияи Ӯзбекистон, дар сурати ғайриимкон будани иҷрои уҳдадориҳо аз ҷониби президент, ин вазифа ба дӯши раиси палатаи болоии парлумони кишвар (сенат) вогузор мегардад, ки айни замон ин мансабро Неъматулло Юлдошев ишғол мекунад.
