Аксияҳои эътирози донишҷӯёни тоҷик алайҳи ҳузури мухолифини тоҷик дар ҷаласаи САҲА оид ба ченаки инсонӣ дар Варшава идома доранд.
Ҷавонони тоҷик муддати се рӯз аст, ки пайдарпай даст ба аксияҳои эътирозӣ мезананд. Онҳо аз иҷозаи вуруди ҷонибдорони Ҳизби фаъолияташ манъшудаи наҳзати исломӣ ва «Гурӯҳи 24» ба толори ҷаласаи САҲА норозигӣ изҳор мекунанд.
21 сентябр наздики 50 нафар намояндагони созмони ҷавонони «Пешоҳанг»-и Тоҷикистон назди бинои Дафтари САҲА дар Душанбе ҷамъ омада, аз ин ниҳод посух ба муроҷиаташонро дархост намуда буданд. Дар муроҷиатномаи онҳо аз он изҳори тааҷҷуб шуда буд, ки чӣ гуна рӯзи 19 сентябр ҷонибдорони Ҳизби фаъолияташ дар Тоҷикистон манъшудаи наҳзати исломӣ ва «Гурӯҳи 24», ки Суди олии Тоҷикистон онҳро террористиву ифротгаро эълон кардааст, бидуни монеъа ба толори ҷаласаи САҲА дар Варшава ворид шудаанд.
22 сентябр намояндагони созмони ҷавонони «Пешоҳанг» дар Донишгоҳи давлатии омӯзгории Тоҷикистон дар Душанбе як аксия доир намуданд. «ҲНИТ мехоҳад боз дар Тоҷикистон ҷангро сар кунад», – изҳор дошт ба донишҷӯён Сайдулло Қувватов, яке аз пешвоёни «Пешоҳанг», ки худ низ толибилми ин донишгоҳ аст.
Ба ин саф ҳамчунин як гурӯҳи донишҷӯёни Донишкадаи омӯзгорӣ дар ноҳияи Рашт низ пайваста, аз САҲА интиқод карданд, ки гуруҳҳои зиддиҳукуматии Тоҷикистонро ба толори баргузории ҷаласа роҳ додааст.
23 сентябр ба аксия донишҷӯёни Донишгоҳи давлатии тиббии Тоҷикистон низ ҳамроҳ шуданд. Субҳ наздики 400 нафар донишҷӯён-табибони оянда дар толори конфронси донишгоҳ ҷамъ омада, алайҳи ҳузури мухолифони ҳукумати Тоҷикистон дар ҷаласаи САҲА дар Варшава эътироз намуданд.
Ғайр аз ин, чунин чорабинӣ дар Донишгоҳи техникии Тоҷикистон ба номи М.Осимӣ низ созмон дода шудааст.
Хабаргузории «Азия-Плюс» ба Вазорати маориф ва илми ҷумҳурӣ муроҷиат намуда, аз онҳо бипурсид, ки «оё чунин аксияҳо ба ҷараёни таҳсил халал намерасонанд?». Посух доданд, ки «аз ин чорабиниҳои дар вақти хониш доирмегардида огаҳӣ надоранд».
Сухангӯи Вазорат Эҳсон Хушвахтов изҳор кард, ки Вазорати маориф ба мактабҳои олӣ доир ба баргузории аксияҳо ҳеҷ гуна дастуре надодааст.
Қобили зикр аст, ки қаблан намояндаи Тоҷикистон ба иттиҳоми ҳомиёни ҳуқуқ ва намояндагони мухолифон посух гуфта, онҳоро шарикони созмони террористии Давлати исломӣ номид.
