Муҷассамаи Абӯалӣ ибни Сино, ки соли 1984 дар маҳаллаи Қарияи Болои шаҳри Душанбе гузошта шудааст, ба ҷои дигар кӯчонида мешавад.
Дар доираи амалисозии лоиҳаи таъмиру азнавсозии роҳи мошингард аз муҷассамаи Сино то дарвозаҳои ғарбии Душанбе дар ҷойи муҷассама сохтмони гузаргоҳи зеризаминӣ пешбинӣ шудааст.
Аз ин рӯ, муҷассамаи Абӯалӣ ибни Сино ба ҷойи дигар кӯчонида мешавад ва мақомоти шаҳрдории пойтахт айни замон макони нави гузоштани онро муайян карда истодаанд. Дар ин бора ба «Азия-Плюс» як манбаъ аз ҳукумати ҷумҳурӣ иттилоъ дод.
Зимнан зикр гардид, ки дар доираи татбиқи лоиҳаи дар боло зикршуда ҳамчунин кӯчонида шудани дарвозахои ғарбии пойтахт, бурида шудани тақрибан 3 ҳазор дарахт дар майдони сохтмони роҳ ва қатъи фаъолияти чандин нуқтаҳои фурӯш дар назар аст.
