Ҳайати Тоҷикистон бо роҳбарии Вазири корҳои хориҷӣ Сироҷидин Аслов санаи 4 октябри соли 2016 дар чорабинии канорӣ дар мавзӯи “Ҳамгироии минтақавӣ ва шукуфоӣ”, ки дар пешорӯи Конфронси байналмилалии Брюссел оид ба Афғонистон баргузор шуд, ширкат намуд.
Бино ба иттилои Вазорати корҳои хориҷии ҷумҳурӣ, дар ин ҷаласа атрофи нақши зерсохтор, транзит ва тиҷорати минтақавӣ дар таъмини сулҳу субот дар Афғонистон ва роҳҳои эҳёи иқтисодию иҷтимоии ин кишвар дар заминаи тақвияти ҳамкориҳои минтақавӣ табодули назар сурат гирифт.
Сироҷидин Аслов дар суханронии хеш ташаббусҳои созандаи Тоҷикистон ҷиҳати таъмини сулҳу субот дар Афғонистон, аз ҷумла аҳамияти иҷрои тарҳҳои зерсохтории миллию минтақавиро, бахусус дар ҷодаҳои энержӣ, иртибототи нақлиётӣ, нерӯгоҳҳои барқи обӣ ва таъсиси бозорҳои наздисарҳадиро таъкид намуд. Дар ин росто ҳамчунин таваҷҷуҳи ширкаткунандагони чорабинии мазкур ба зарурати гирифтани иқдомҳои муассир барои таъмини амнияти долонҳои нақлиётӣ дар Афғонистон ва бартарафсозии монеаҳо дар самти тиҷорати байниминтақавӣ ва ҳамлу нақли транзитӣ, ки ҷавобгӯи манфиатҳои мардуми Афғонистон ва шукуфоии иқтисодии минтақа аст, ҷалб карда шуд.
Конфронси байналмилалии Афғонистон зери унвони “Шарикӣ баҳри шукуфоӣ ва сулҳ” бо ширкати ҳайатҳои 70 кишвар ва 30 созмону ниҳодҳои байналмилалӣ ба мақсади кумакҳои молӣ барои бозсозии Афғонистон дар чаҳор соли оянда рӯзи 5 октябри соли 2016 дар Брюссел баргузор мешавад.
