Ҳаҷми Маҷмӯи маҳсулоти дохилӣ (ММД)-и Тоҷикистон тӯли 9 моҳи соли ҷорӣ ҳудуди 38 млрд. сомонӣ (беш аз 4,8 млрд. доллари ИМА бо қурби ҳозира)-ро ташкил дод, ки нисбат ба нархҳои қиёсии ҳамин давраи соли гузашта 6,7% зиёдтар аст.
Бино ба маълумоти Агентии омори назди президенти ҶТ, дар сохтори ММД-и кишвар дар ин давра 20,3% – ба ҳиссаи бахши кишоварзӣ, шикор ва хоҷагии ҷангал, моҳидорӣ ва моҳипарварӣ, 14,9% – ҳиссаи саноат бо шумули энергетика, 14,4% – ба савдо, таъмири автомобилҳо, асбобҳои маишӣ ва лавозимоти гигиенаи шахсӣ, меҳмонхонаҳо в атарабхонаҳо, 12,3% – ба нақлиёт, алоқа ва хоҷагии анбор, 11,7% – ба андозҳо ва 10,8% – ба ҳиссаи сохтмон рост меояд.
Қобили зикр аст, ки ҳукумати Тоҷикистон афзоиши ҳаҷми ММД аз рӯйи натиҷаҳои соли 2016-ро дар сатҳи то 7% пешбинӣ кардааст. Соли 2015 ҳаҷми ММД Тоҷикистон 48,4 млрд. сомониро ташкил дода, аз рӯи таносуби нарх нисбат ба соли 2014 ба миқдори 6% афзуд.
Чанде пеш дар гузориши моҳи октябри Хазинаи байнулмилалии асъор «Дурнамои рушди иқтисоди ҷаҳон» (World Economic Outlook) дурнамои рушди Маҷмӯи маҳсулоти дохилӣ (ММД)-и Тоҷикистон нисбатан беҳтар – дар сатҳи 6% пешгӯӣ шуд.
Дар ҳамин ҳол, Бонки осиёгии рушд (БОР) ҳаҷми афзоиши ММД Тоҷикистон дар соли 2016-ро дар сатҳи 4,2%, сатҳи таваррум – 7%; Бонки аврупоии таҷдиду рушд ҳаҷми афзоиши ММД Тоҷикистон дар соли 2016-ро дар сатҳи 4,5%; Хазинаи байнулмилалии асъор рушди ММД Тоҷикистон дар соли равонро дар сатҳи ҳамагӣ 3,4% ва мизони таваррумро – 8,2% пешгӯӣ мекунанд.
Коршиносони Бонки ҷаҳонӣ сатҳи рушди ММД Тоҷикистон дар соли 2016-ро – 4,8% ва мизони тавррумро – 7,5% пешгӯӣ кардаанд.
.JPG)
ИЗОБРАЖЕНИЕ Сохтори ММД Тоҷикистон
