Бонки миллии Тоҷикистон (БМТ) иҷозатномаи боз як ташкилоти қарзии хурди ҷумҳуриро бозхонд кард. ҶСП ТҚХ «Мададгори Мастчоҳ» муфлис эътироф шудааст.
Бино ба маълумоти дафтари матбуоти БМТ, қарори бозхонди иҷозатномаи фаъолияти ташкилоти қарзии хурди «Мададгори Мастчоҳ»-ро Раёсати Бонки миллӣ аз 9 ноябри соли 2016 қабул кардааст.
Гуфта мешавад, мутобиқи қарори зикршуда иҷозатномаи ташкилоти қарзии номбурда, ки моҳи феврали соли 2013 барои анҷом додани амалиётҳои бонкӣ дода шудааст, аз эътибор соқит дониста шуд.
«Ҷанбаҳои дигари фаъолияти ташкилоти мазкур дар асоси қарори қабулгардида аз ҷониби масъулини БМТ баррасӣ ва тибқи тартиби муқарраргардида ба суд пешниҳод карда мешавад», – омадааст дар хабари Бонки миллӣ.
