Ба қарибӣ дастаи наврасони тоҷик аз олимпиадаи байналмиллалии математикони наврас, ки синнашон аз 13-сола хурд аст, аз кишвари Индонезия бо як медали тило ва 4 медали биринҷӣ баргаштанд. Олимпиада аз 9 то 13 ноябри соли равон доир гардида, дар он наврасони дорои дониши хуби математикии 23 кишвари ҷаҳон ширкат варзиданд.
Фарқияти асосии олимпиадаи мазкур дар он аст, ки масъалаҳо на танҳо мушкилу печидаанд, балки онҳо танҳо бо забони англисӣ пешниҳод мешаванд. Бинобар барои ғолиб омадан аз наврасон новобаста аз хурдиашон, на танҳо донишу заковати хуби математикӣ, балки дониши равони англисӣ низ талаб карда мешавад.
Дар олимпиада шарафи Тоҷикистонро хонандагони Литсейи байналмиллалии президентӣ ва литсей-интернати тоҷикӣ-русии «Ҳотам ва ПВ», ғолибони озмуни интихобии наврасони Точикистон бо сарбаландӣ ҳифз намуданд. Медали тилоро Ҳотами Бахтовар аз ЛИТР «Ҳотам ва П. В.» ва медалҳои биринҷиро Ҷанобилов Теҳрон, Ҳотамов Абдурауф, Пиров Вазир аз ЛИТР «Ҳотам ва П. В.» ва Усмонов Тимур аз литсейи байналмиллалии президентӣ ба даст оварданд.
Вазорати маориф ва илми Тоҷикистон ба ғолибони Олимпиада яктогӣ планшет туҳфа намуд, ки дар он тамоми китобҳои дарсию ёрирасон бо забонҳои тоҷикию русӣ сабт шудаанд.
