Дар шаҳри Сеули Кореяи Ҷанубӣ санаи 23 ноябр Озмуни касбии ҷаҳонии зебоӣ ва истеъдод – Miss SuperTalent of the World оғоз мегардад, ки Тоҷикистонро дар он бори нахуст модел Диана Нуруллина намояндагӣ мекунад.
Miss SuperTalent of the World яке аз озмунҳои бонуфузи ҷаҳонӣ маҳсуб ёфта, дар он намояндагони 160 кишвари дунё, аз қабили Австралия, Италия, Британияи Кабир, Канада, Чин, Колумбия, Ҳиндустон, ИМА, Ҷопон ва дигар кишварҳо ширкат меварзанд.
Қобили зикр аст, ки дар озмуни Miss SuperTalent of the World продюсерҳои маъруфи Голливуду Болливуд ва намояндагони ширкатҳои бузурги атторӣ (парфюмерӣ)-и ҷаҳон низ ҳузур хоҳанд дошт, ки барои маъракаҳои рекламавии худ моделҳо ҷустуҷӯ мекунанд. Аз ин рӯ, ин озмун майдони имзои қарордодҳо низ унвон мешавад.
Диана Нуруллина аз 14-солагӣ тарбиятгирандаи студияи моделии «Новая Эра» мебошад. Чанде қабл ӯ аз озмуни зебоии Miss World Rusdian Beauty (Маскав) баргашт, ки дар бахши «Young Miss»-и озмуни мазкур зинаи дуюмро касб карда, ба унвони маликаи дуюми озмуни зебоии кишварҳои ИДМ соҳиб шуд.
