Энергетикҳои пойтахт тариқи шабакаҳои телевизиони давлатӣ зикр мекунанд, ки дар шаҳри Душанбе ҳеҷ гоҳ бидуни огоҳии барвақтии аҳолӣ, дар шабакаҳои барқӣ корҳои таъмиру барқарорсозӣ гузаронида намешаванд.
«Як рӯз то баргузор кардани ин корҳои тарҳрезишуда дар шабакаҳои барқӣ аҳолӣ тавассути шабакаҳои телевизиони давлатӣ огоҳ карда мешавад. Эълонҳо дар сатрҳои гузарон ҷой дода мешаванд», – изҳор дошт ба «Азия-Плюс» сармуҳандиси шабакаҳои барқи шаҳри Душанбе Абдуалим Самизода.
Ғайр аз ин, ба гуфтаи ӯ, дар бораи баргузор намудани корҳои таъмиру барқарорсозӣ дар шабакаҳои барқи мақомоти шаҳрдории пойтахт низ расман огоҳ карда мешавад.
«Корҳои таъмиру барқарорсозии ғайринақшавӣ дар шабакаҳо, ки асосан бар асари садмаҳо дар хатҳои интиқоли барқ, зеристгоҳҳои барқӣ ба вуҷуд меоянд, таъҷилан гузаронида мешаванд. Табиист, ки дар ин ҳолатҳо пешакӣ огоҳ кардани аҳолӣ ғайриимкон аст», – афзуд Самизода.
Қобили зикр аст, ки айни замон дар Тоҷикистон шабакаҳои телевизионӣ давлатии «Шабакаи аввал», «Сафина», «Ҷаҳоннамо», «Баҳористон», «Варзиш» амал мекунанд.
