Дар ширкати ҳавопаймоии «Сомон Эйр» маълумот доир ба таъхири парвози ҳавопаймо ба Душанбе аз фурудгоҳи шаҳри Иркутскро тасдиқ намуда, зикр карданд, ки мусофирони ин хатсайр аллакай муддати як шабонарӯз интизори парвоз мебошанд.
«Мо ҳамеша бо онҳо дар робита ҳастем, мо он ҷо намояндаи худро дорем, – мегӯяд як манбаъ дар ширкат. – Агар тавофуқ ҳосил шавад, шоми имрӯз, тақрибан соати 18:00 парвоз ба Душанбе аз ин фурудгоҳ дар назар аст. Вале агар парвоз сурат нагирад, ҳамаи мусофирон метавонанд пулҳои худро бозгашт гиранд».
Афроде, ки зери поварақи хабари «Уральские авиалинии» выполняет рейсы в Таджикистан без ограничений» шарҳ гузоштаанд, менависанд, ки пулҳои онҳоро барнагардонида, гуфтаанд, ки пагоҳ дар ҳамин вақт ҳозир шаванд ва Тимур Бандишоев (сухангӯи «Сомон Эйр») дурӯғ мегӯяд. Ҳамчунин зикр мешавад, ки онҳо ба фурудгоҳи Иркутск аз минтақаҳои Братск, Сургут ва ғайра омода, шабона ҳеҷ ҷои рафтание надоранд ва дар берун ҳаво 32 дараҷа хунук аст.
Ба гуфтаи манбаъ дар ширкати ҳавопаймоӣ, то дирӯз 27 нафар ба намояндаи «Сомон Эйр» дар фурудгоҳи Иркутск муроҷиат намуда, «барои шабгузаронии ҳамаашон шароит муҳайё шудааст». Дигар шаҳрвандон ҳам метавонанд муроҷиат кунанд, ба ҳамаашон кумаку мусоидат мекунем», – гуфт манбаъ.
Ба гуфтаи ӯ, айни замон ширкат ба мусофирони ду хатсайр ба Краснодар, ду хатсайр ба Красноярск ва як хатсайр ба Оренбург пулҳояшонро баргардонидааст.
«Баргардонидани пулҳо бидуни ягон мушкилӣ ҳам дар Душанбе ва ҳам дар шаҳрҳои Русия сурат мегирад, – мегӯяд намояндаи «Сомон Эйр». – Агар нафаре бо сабабе пулашро барои баргардонидани билет дар шаҳрҳои Русия гирифта натавонад, ба ин ҷо омада, дар мудатти як сол онро дастрас карда метавонад».
Ёдрас мекунем, ки дар посух ба қарори Тоҷикистон доир ба иҷоза надодани парвози ҳавопаймоҳои ширкати «Ямал» аз фурудгоҳи Жуковский, парвозҳои ширкати «Сомон Эйр» ба минтақаҳои Русия санаи 23 декабр қатъ карда шуданд.
Қаблан аз ширкати ҳавопаймоии «Сомон Эйр» изҳор дошта буданд, ки ба баргардонидани пулҳои мусофироне, ки ба хатсайрҳои Душанбе-Оренбург, Душанбе-Краснодар, Душанбе-Иркутск ва Душанбе-Красноярск билетҳо харида буданд, оғоз намудаанд.
