Шурӯъ аз имрӯз сокинони минтақаҳои Тоҷикистон рӯзона бидуни маҳдудият бо нерӯи барқ таъмин карда мешаванд. То ин замон интиқоли барқ ба минтақаҳои деҳоти кишвар аз соати 11:00 то 16:00 қатъ мегардид.
«Мувофиқи ҷадвали нави чанде қабл қабулшуда минтақаҳо аз имрӯз муддати 17 соат – аз соати 05:00-и субҳ то 22:00-и шаб бо нерӯи барқ таъмин карда мешаванд, – гуфт ба «Азия-Плюс» дар ин робита сардори хадамоти матбуоти ширкати «Барқи тоҷик» Нозир Ёдгорӣ. – Ин имкон ба туфайли мавриди баҳрабардорӣ қарор гирифтани навбати дуюми Маркази барқу гармидиҳии Душанбе фароҳам шуд».
Намояндаи ширкати «Барқи тоҷик» зикр кард, ки баъди мавриди истифода қарор гирифтани навбати дуюми ин Марказ иқтидори он то 400 МВт афзуд, ки акнун барои истеҳсоли то 9,6 кВт/соат нерӯи барқ дар як шабонарӯз имкон дода, ғайр аз ин, дар Марказ боз шабонарӯзӣ 235 гигакалорий гармӣ низ истеҳсол мешавад.
«Давоми моҳ Маркази барқу гармидиҳии Душанбе-2 тадриҷан ба иқтидори лоиҳавӣ баромада, мутаносибан мо ҳам интиқоли барқ ба аҳолӣ дар минтақаҳои деҳотро зиёд кардем, – иброз дошт ӯ. – Ҳамчунин ёдрас карданиам, ки баъди ба истифода додани навбати дуюми Марказ, интиқоли барқ нахуст се соат ва нимаи моҳи декбар боз як соати дигар зиёд карда шуда буд».
Ёдрас мекунем, ки реҷаи маҳдуди истифодаи барқ дар Тоҷикистон расман аз 1 ноябри соли равон ҷорӣ гардида, он танҳо ба пойтахт ва шаҳрҳои бузурги ҷумҳурӣ дахл надошт.
