Зимни нишасти хабарии Кумитаи заминсозӣ ва геодезияи ҷумҳурӣ зикр гардид, ки бар асари хунукназарии комиссияҳои маҳаллии тақсимоти замин, қитъаҳои ҷудошуда насиби миёнаравон ё афроде мешаванд, ки ба васеъкунии манзили зисташон ниёз надоранд.
Раиси Кумитаи давлатии заминсозӣ ва геодезияи ҷумҳурӣ Раҷаббой Аҳмадзода дар ин робита вазъ дар Ҳисорро мисол оварда, қайд кард, ки дар ин ноҳия барои қитъаҳои наздиҳавлигӣ ба аҳолӣ 1 298,7 гектар қитъаи замин ҷудо шуда, вале то ҳол 31%-и аҳолӣ қитъаи замин нагирифтааст.
«Чанде қабл мақомоти прокуратура 700 адад қарори собиқ раиси ноҳияи Ҳисор дар бораи ҷудо шудани қитъаи заминро бекор карда, онро ғайриқонунӣ шумурд», – иброз дошт раиси Кумита.
Зимнан зикр гардид, ки тибқи маълумоти мавҷуда аз сарчашмаҳои дигар, ин қитъаҳои замин бояд миёни 500 нафар аризадодагон тақсим мешуданд, вале аз ҳисоби кам кардани меъёри ҷудокунӣ, 706 нафар шаҳодатномаи замин гирифтаанд ва ғайр аз ин, қисмате аз ин қитъаҳо ба шахсоне дода шудаанд, ки ба он эҳтиёҷе надоштаанд.
