Кумитаи андози Тоҷикистон маълумот нисбат ба ширкати Tcell дар бораи эътирозҳояш оид ба пардохти андозро тасдиқ намуд. Баҳсҳои тарафҳо сари ин масъала аз ҷониби мақомоти суд мавриди баррасӣ қарор дорад.
«Ҳақикатан ҳам дар ҷараёни санҷиши мо рӯйпӯш кардани андозҳо аз ҷониби ин ширкат ба маблағи беш аз 155 млн. сомонӣ ошкор шуд», – гуфт зимни нишасти хабарӣ раиси Кумитаи андози ҷумҳурӣ Нусратулло Давлатзода.
Ӯ таъкид дошт, ки зимни санҷишҳои соли гузаштаи Кумита, дар дигар ширкатҳои алоқаи мобилӣ низ далелҳои рӯйпӯш кардани андозҳо ба маблағҳои зиёд ошкор шудаанд.
Ғайр аз ин, ба қавли Давлатзода, дар ширкати «МЛТ» (зери тамғаи «Мегафон») низ Кумита ба маблағи 155 млн. сомонӣ рӯйпӯш шудани андозҳоро ошкор намуда, қисмате аз ин маблағҳо дар ҷараёни баҳсҳои судӣ ва боқимонда баъди содир шудани қарори суд пардохт шудаанд.
«Дар ширкати «Таком» (зери тамғаи «Билайн») ба маблаги 151,3 млн. сомонӣ рӯйпӯш кардани андозҳо ошкор шуда, ҷиҳати ҳаллу фасли ин масъала ба нафъи худ, ширкат тамоми зинаҳои судиро паси сар кард, вале ҳама қарорҳо ба нафъи буҷет содир шуданд, – иброз дошт номбурда. – Ширкат аллакай 80%-и қарз аз андоз ва ҷаримаҳоро пардохта, мо бо раҳбарияти он доир ба давра ба давра пардохт шудани маблағи боқимонда то моҳи март ба созиш расидем».
Раиси Кумитаи андоз ҳамчунин таъкид кард, ки санҷишҳои ширкатҳои алоқаи мобилӣ ҳамасола дар доираи чорабиниҳои қонунии нақшавӣ гузаронида мешаванд.
«Ширкатҳои хориҷии машғули кор дар Тоҷикистон на ҳамеша комилан бо қонунгузорӣ дар бахши андози ҷумҳурӣ шинос буда, дар ин робита чунин нофаҳмиҳо ба миён меоянд», – изҳори таассуф кард Давлатзода.
Ёдрас мекунем, ки соли 2014 дигар ширкати алоқаи мобилӣ – «Вавилон-М» низ ба маблағи 341 млн. сомонӣ ҷарима шуда буд. Ширкат ҳамаи баҳсҳои судӣ бо мақомоти андозро бохт. Айни замон ширкат қисм-қисм қарзҳояш назди Кумита андозро пардохт мекунад.
