Раиси Маҷлиси намояндагони Маҷлиси Олии Тоҷикистон Шукурҷон Зуҳуров имрӯз бо сафири Афғонистон дар Тоҷикистон Муҳаммадгул Залмай Юнусӣ дидору гуфтушунид карда, зимни мулоқот бештар ба масъалаи тақвияти ҳамкориҳои байнипарлумонӣ миёни Душанбе ва Кобул таваҷҷуҳ зоҳир карда шуд.
Бино ба иттилои сомонаи расмии палатаи поёнии парлумон, Шукурҷон Зуҳуров гуфтааст, имрӯз дар партави талошҳои муштараки Сарони ду кишвар ва натиҷаҳои вохӯриҳои сатҳи олӣ ҳамкориҳои Тоҷикистон ва Афғонистон дар заминаҳои сиёсӣ, иқтисодӣ ва фарҳангӣ бемайлон густариш меёбанд ва дар ростои манофеи мардумони ду кишвар самтҳои навро фаро мегиранд.
Шукурҷон Зуҳуров ҳамчунин иброз намудааст, ки бештари тарҳҳои иқтисодӣ ва зерсохтории иҷтимоӣ, энергетикӣ ва нақлиётӣ, ки дар Тоҷикистон татбиқ шудаанд ва ё дар ҳоли татбиқ ҳастанд, пулҳое мебошанд, ки Афғонистонро дар ояндаи наздик ҳамчун шарики муҳими иқтисодӣ ва тиҷоратӣ бо минтақаи Осиёи Марказӣ ва берун аз он пайваст хоҳад кард.
«Тоҷикистон ҳамеша ҷонибдори сулҳу ризоят дар Афғонистон буда, мо ҳамеша ташаббусҳои ҷомеаи ҷаҳонӣ, раҳбарияти Афғонистонро дар роҳи ноил гардидан ба сулҳу созиш дар кишвари дӯст, ки моро бо ҳам робитаҳои чандинсараи таърихиву фарҳангӣ мепайванданд, ҳамеша дастгирӣ мекунем, – таъкид доштааст Ш.Зуҳуров – Мардуми Тоҷикистон ҳамвора худро дар канори мардуми Афғонистон дониста аз пешрафтҳои иқтисодию иҷтимоӣ ва талошҳои созандаи ҳукумату мардуми кишвари дӯст, ҳамзабон ва ҳамфарҳанг пуштибонӣ мекунад»..
Сафири низ хостори густариши муносиботҳои байнипарлумонӣ шуда, таъкид доштааст, ки истифода аз таҷрибаи қонунофарии парлумони Тоҷикистон барои такмили фазои қонунгузорӣ дар Афғонистон мусоидат хоҳад кард.
