Аудиторони Палатаи ҳисоби Тоҷикистон соли гузашта дар ҷараёни 530 санҷишҳо дар вазорату идораҳо, ҳамчунин дигар ташкилоту муассисаҳои буҷетӣ ба маблағи ҳудуди 224 млн. сомонӣ (наздики 30 млн. доллар) зиёни молиявӣ ошкор кардаанд.
Муовини раиси Палатаи ҳисоб Зафар Азимӣ дар ин робита изҳор дошт, ки аз ҷумла ба маблағи беш аз 85,6 млн. сомонӣ ғайриқонунӣ хароҷот кардани воситаҳои давлатӣ, зиёд нишон додани ҳаҷми корҳои таъмиру сохтмон (92 млн. сомонӣ), кам нишон додан ва рӯйпӯш сохтани маблағҳои пардохти андоз (37,2 млн. сомонӣ), талафи воситаҳои моливу пулӣ аз фаъолияти хоҷагидории нодуруст (4,9 млн. сомонӣ), камбуд (дуздӣ)-и воситаҳои моливу пулӣ (беш аз 1,6 млн. сомонӣ) ва ғайра ошкор карда шудаанд.
Зимни санҷишҳо дар Агентии хариди давлатии молу кор ва хизматрасониҳои назди ҳукумат, Агентии суғуртаи иҷтимоӣ ва нафақаи назди ҳукумат ва Академияи илмҳои кишоварзии Вазорати кишоварзӣ маблағҳои нисбатан зиёди зарари молиявӣ ошкор карда шудаанд.
Ҳамчунин дар ҳамкорӣ бо мутахассисони Кумитаи андози назди ҳукумат аудиторони Палатаи ҳисоб дар ҳаҷми наздики 30 млн. сомонӣ зиёнро ошкор карда, ҳудуди 83 маводи санҷишҳои аудиторӣ ҷиҳати чораҷӯйӣ ба ихтиёри мақомоти ҳифзи ҳуқуқ дода шудааст.
