Муовини нахуствазири Тоҷикистон Азим Иброҳим аз энергетикҳои кишвар тақозо намуд, ки тарзи кор дар мавриди хизматгузорӣ ба аҳолиро тағйир дода, ба коҳиши ҳаҷми талафоти нерӯи барқ муваффақ гарданд.
Зимни машварати корӣ дар идораи марказии шабакаҳои барқии шаҳри Душанбе ӯ изҳор намуд, ки дар мавсими зимистон ба ҳисоби миёна 25%-и барқи дар кишвар истеҳсолшуда дар шаҳри Душанбе истифода мешавад.
«Садамаҳои сершумор дар хатҳои интиқоли барқ ва арзу шикоятҳои зиёди сокинони пойтахт гувоҳи онанд, ки кормандони шабакаҳои барқи шаҳр ба мавсими зимистон ҳамаҷониба омодагӣ намегиранд», – гуфт муовини нахуствазир.
Ӯ ҳамчунин аз талафоти зиёди техникӣ дар шабакаҳои барқи шаҳр сухан гуфта, зикр кард, ки ин талафот асосан дар натиҷаи истифодаи ғайриқонунии нерӯи барқ ба вуҷуд меояд. Азим Иброҳим ба раҳбарияти идораи шабакаҳои барқи Душанбе дастур дод, ки дар фурсати кӯтоҳ ҳаҷми талафот дар шабакаҳоро то 13 фоиз поин бубаранд.
Қобили зикр аст, ки тибқи маълумоти ширкати «Барқи тоҷик», соли гузашта аз миқдори умумии нерӯи барқи истеҳсолшуда дар кишвар ҳаҷми талафоти техникӣ дар шабакаҳои барқ ҳудуди 17 фоизро ташкил додааст.
Муовини нахуствазир ҳамчунин ҷиҳати саривақт ҷамъоварии маблағи истифодаи барқ аз аҳолӣ дастур супоришҳои мушаххас дод.
