Президенти Тоҷикистон Эмомалӣ Раҳмон ба Гурбонгулӣ Бердимуҳамедов ба муносибати пирӯзӣ дар интихоботи навбатии Президенти Туркманистон барқияи табрикӣ ирсол намуд.
Бино ба иттилои хадамоти матбуоти сарвари давлат, дар барқияи Эмомалӣ Раҳмон аз ҷумла қайд мешавад, ки «аз нав интихоб шудани Шумо ба ин маснади масъули давлатӣ баёнгари возеҳи эътимоди баланди мардум нисбат ба роҳи сиёсие мебошад, ки таҳти роҳбарии Шумо ба хотири шукуфоии бемайлони кишвар ва некуаҳволии мардуми он мавриди татбиқи амалӣ қарор дорад».
«Итминон дорам, ки дар давраи нави фаъолияти президентии Шумо муносибатҳои дӯстӣ ва ҳамкориҳои мутақобилан судманди Тоҷикистону Туркманистон минбаъд низ ба нафъи ду давлат ва мардумонашон таҳкиму рушд хоҳанд ёфт», – омадааст дар барқия.
Ёдрас мекунем, ки президенти феълии Туркманистон Қурбонгулӣ Бердимуҳаммадов бо касби 97,69 дарсади оро дар интихоботи президентии ин кишвар рӯзи 12 феврал пирӯз эълом шуд. Ба ғайр аз ӯ дар интихобот боз ҳашт номзади дигар ширкат доштанд. Кумисюни марказии интихоботии Туркманистон гуфтааст, зиёда аз 97%-и интихобкунандагон райъ доданд.
