Ҳукумати Тоҷикистон қариб ба ҳамаи навъҳои фаъолияти соҳибкории инфиродӣ, ки бар асоси патент амалӣ мешаванд, шартҳои андозбандиро сабуктар кард.
Мувофиқи қарори ҳукумат «Дар бораи тасдиқи қоидаҳои андозбандии соҳибкорони инфиродие, ки дар асоси патент ё шаҳодатнома фаъолият менамоянд», дар таҳрири нав (аз 25 январ) ҳаҷми меъёри патент ба миқдори 14-15% кам шудааст.
Ҳамин тариқ, акнун ҳар моҳ барои кашонидани мусофирон тариқи воситаи нақлиёти сабук – 90 сомонӣ ба ивази 105 сомонӣ, микроавтобусҳо – 150 сомонӣ ба ҷойи 177 сомонӣ, автобусҳо – 120 сомонӣ ба ҷойи 139 сомонӣ андоз пардохт кардан лозим меояд.
Пардохти маблағи патент барои фурӯши яхмос, маснӯоти қаннодӣ, асал, ҳамаи навъҳои ширниҳо, самбӯса, биринҷ ва хушкмева – аз 158 сомонӣ то ба 135 сомонӣ, мева – аз 123 сомонӣ то ба 105 сомонӣ, нӯшокиҳои ғайримашруботӣ – аз 105 сомонӣ то ба 90 сомонӣ, нос – аз 281 сомонӣ то ба 240 сомонӣ ва қисмҳои эҳтиётӣ барои воситаҳои нақлиёт – аз 234 сомонӣ то ба 200 сомонӣ кам карда шудааст.
Патенти ҳармоҳа барои ҳуқуқи овозхонӣ дар тӯй ва дигар маросимҳои ҷашнӣ – аз 633 сомонӣ то ба 540 сомонӣ ва хизматгузориҳои мусиқиву рақс ва барандагӣ дар тӯй ва дигар ҷашнҳо – аз 139 сомонӣ то ба 120 сомонӣ пойин бурда шудааст.
Барои пешниҳоди хизматгузории ҳоҷатхонаи ҷамъиятӣ акнун – ба ҷойи 211 сомонӣ 180 сомонӣ, барои иҷрои корҳои сохтмон дар иншооти шахсони воқеӣ – ба ивази 139 сомонӣ 120 сомонӣ маблағи андоз пардохт кардан зарур аст.
Қобили зикр аст, ки аз соли 2014 Вазорати молия ва Кумитаи андоз ваколдатдор шуда буданд, ки ҳамасола бо назардошти сатҳи таваррум дар соли гузашта, ҳаҷми меъёри патентро индексатсия ва муқаррар намоянд.
Бо қарори ҳукумат дар таҳрири нав соли равон ҳаҷми меъёрҳои патент амалан то сатҳи соли 2013 поин бурда шуда, дар назар аст, ки се соли наздик (то соли 2019) меъёри патентҳо тағйир дода намешаванд.
