Дар варзишгоҳи “Саппоро – Доум” – и Ҷопон рӯзи 19 феврал маросими расмии ифтитоҳи VIII -умин Бозиҳои зимистонаи осиёӣ баргузор гардид.
Бино ба маълумоти Кумитаи ҷавонон, варзиш ва сайёҳии назди ҳукумати ҶТ, дар чорабинии мазкур Аҳмад ал – Фаҳд ал – Сабоҳ Президенти Кумитаи олимпии Осиё, Нарухито шоҳзодаи валиаҳди Ҷопон, роҳбарияти ҳайатҳои дастаҳо, варзишгарон, намояндагони ВАО ва дигарон иштирок намуданд.
Дар Бозиҳои VIII – умин зимистонаи осиёӣ ҳудуди 2000 нафар варзишгарону мураббиён ва шахсони расмӣ аз 32 дастаҳои мунтахаби кишварҳои қораи Осиё иштирок менамоянд. Ин шумора дар Бозиҳои VII зимистонаи Осиё дар шаҳри Алматии Қазоқистон ба 843 варзишгар ва 26 дастаро ташкил медод.
Шасту чор мусобиқа аз рӯи 11 намуди варзиш аз ҷумла биатлон, лижаронии кӯҳӣ, кёрлинг, конкитозӣ, пойгаи лижаронӣ, ҷаҳиш бо лижа аз трамплин, сноуборд, рақси рӯи ях, фристайл, хоккей бо шайба, шорт-трек дар шаҳрҳои Саппоро ва Обиҳиро баргузор хоҳанд шуд.
Зикр мегардад, ки маротибаи сеюм аст, ки шаҳри Саппоро мизбони Бозиҳои зимистонаи Осиё мешавад. Солҳои 1986, 1972 ва 1990 низ дар ин шаҳр баргузор гашта буд.
Ҳайати дастаи Тоҷикистон иборат аз Соҳибназари Турсунмурод, Баракатулло Зокиров, Сайфиддини Низомиддин ва Баҳриддин Ғоибов аз намудҳои лижаронии куҳӣ дар ин бозиҳо иштирок менамоянд.
Варзишгарони тоҷик таҳти сарпарастии Ассотсиатсияи миллии намудҳои зимистонаи варзиши Тоҷикистон имкони иштирок дар ин мусобиқаи бонуфузро пайдо намуданд.
Боиси зикр аст, ки баробари фаъол гардидани кори Маҷмааи кӯҳию лижаронии «Сафед-Дара» Ассотсиатсияи миллии намудҳои зимистонаи варзиши Ҷумҳурии Тоҷикистон дубора эҳё гардида, аллакай дар баргузории мусобиқаҳои ноҳиявӣ, ҷумҳуриявӣ ва байналмиллалӣ аз рӯи намудҳои варзиши зимистона саҳм гузошта истодааст.
Дар ин муддати кӯтоҳ Ассотсиатсияи миллии намудҳои зимистонаи варзиши дар ҳамкори бо Кумитаи ҷавонон, варзиш ва сайёҳӣ ва Кумитаи миллии олимпии кишвар чандин ҷамомадҳои машқӣ, таълимӣ ва варзишӣ барои рушду инкишофи намудҳои зимистонаи варзишӣ дар Маҷмааи кӯҳию лижаронии «Сафед-Дара» баргузор намудааст.
Маҳз азнавсозии Маҷмааи кӯҳию лижаронии «Сафед-Дара» имкон дод, ки варзишгарони тоҷик дар шароити созгор ва мутобиқ ба талаботҳои замони муосир тамрин намоянд.
Ҳамчунин қайд мешавад, ки дар соли 2016 Мактаби махсуси кӯдакону наврасон оид ба намудҳои зимистонаи варзиши аз ҷониби Ассотсиатсияи миллии намудҳои зимистонаи варзиши Тоҷикистон аз нав сохта шуда, бо лавозимоти таълимӣ ва синфхонаҳои интерактивии тамринӣ муҷаҳҳас гардидааст.
Дар як муддати кӯтоҳ Ассотсиатсия варзишгарони кишварро дар бошишгоҳҳои тамринии Ҷумҳурии Қазоқистон ва Ҷумҳурии исломии Покистон ба ҷамомадҳои машқӣ, таълимӣ ва варзишӣ фаро гирифт.
Бозиҳои VIII – умин зимистонаи осиёӣ яке аз аввалин имкониятҳои иштирок дар чорабиниҳои сатҳи байналмиллалӣ барои дастаи мунтахаби Ҷумҳурии Тоҷикистон буда, он барои сайқал додани малакаҳои ҳар як узви дастаи мунтахаб муҳим арзёбӣ мегардад.
Роҳбарияти Ассотсиатсияи миллии намудҳои зимистонаи варзиши Тоҷикистон тасмим гирифтааст, ки бо истифода аз таҷрибаи байналмиллалӣ сатҳ ва сифати ин нави варзишро дар кишвар боло бардорад.
