Дар Вазорати корҳои дохилӣ бахшида ба гиромидошти хотираи корманди ҷонфидои мақомоти корҳои дохилӣ старшинаи милитсия Саюмарс Гулмадов маҳфили ёдбуд баргузор гардид.
Бино ба иттилои дафтари матбуоти ВКД Тоҷикистон, дар маҳфили ёдбуд Котиби Шӯрои амнияти Тоҷикистон генерал-полковники милитсия Қаҳҳоров Абдураҳим Абдулаҳадович, вазири корҳои дохилӣ генерал-лейтенанти милитсия Раҳимзода Рамазон Ҳамро, падару модари шодравон Саюмарс Гулмадов ва ҳайати шахсии мақомоти корҳои дохилӣ иштирок доштанд.
ИЗОБРАЖЕНИЕ
Корнамоӣ ва ҷасорату мардонагии старшинаи милитсия Саюмарс Гулмадов дар он лаҳзаҳои душвор ба нафароне, ки ба кӯмаку дастгирии дигарон ниёз доштанд, беҳтарин нишони олии садоқат ба кору вазифа, эҳтиром ба касб, ба ҳаёт ва саломатии онҳо ба ҳисоб меравад.
Зикр гардид, ки кормандони мақомоти корҳои дохилӣ дар якчанд соли охир дар мушкилтарин лаҳзаву соатҳо, алалхусус ҳолатҳои фавқулодда, дар рафъи ҳодисаҳои табиӣ аз қабили сухтор, фаромадани тарма, обхезӣ, ки дар фаслҳои зимиситону баҳор барои мардум мушкилиро пеш меоранд, бо мардум буданд, ҳастанд ва мемонанд.
Онҳо дар баробари ҳифзи молу ашё ва дороии шаҳрвандон, ҷони худро ба хатар гузошта, ҳаёти дигаронро аз марг наҷот доданд.
Бо Фармони Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Гулмадов Саюмарс Аскарович пас аз марг бо мукофоти давлатӣ – медали «Ҷасорат» сарфароз гардонида шуда, Қаҳҳоров Абдураҳим Абдулаҳадович мукофоти давлатиро ба падари Саюмарс – Аскар Гулмадов супорид.
Ҳамчунин, барои зоҳир намудани ҷасурию далерӣ, матонату шуҷоат ва ҳифзи ҳаёти шаҳрвандон корманди Шӯъбаи Хадамоти давлатии «Муҳофиза»-и Вазорати корҳои дохилӣ дар ноҳияи Варзоб сержанти калон Алишер Раҳимзода бо мукофоти давлатӣ – медали «Ҷасорат» қадршиносӣ гардид.
Дар идомаи маҳфили ёдбуд бо Фармони Вазири корҳои дохилии Ҷумҳурии Тоҷикистон барои тарбияи фарзандон дар рӯҳияи хизмати содиқона ба Ватан, садоқат ба савганд, ҷоннисоркунӣ баҳри манфиатҳои шаҳрвандон ва кӯмаки амалӣ ба кормандони мақомоти корҳои дохилӣ зимни бартарафкунии оқибатҳои лағжиши тарма дар шоҳроҳи Душанбе-Хуҷанд падару модари марҳум Саюмарс бо Раҳматнома аз номи Вазири корҳои дохилии Ҷумҳурии Тоҷикистон сарфароз гардонида шуданд.
ИЗОБРАЖЕНИЕ Аз чап ба рост: Падари Саюмарс Аскар Гулмадов, бародараш Каюмарс, модараш Олиҳамоҳ Шукурова ва бародари дигараш Исфандиёр
