Раиси ноҳияи Қубодиёни вилояти Хатлон Зафар Файзуллозода номзад ба вакилӣ дар палатаи болоии парлумон пешбарӣ шудааст.
Тавре ба «Азия-Плюс» як манбаъ аз Комиссияи марказии интихобот ва раъйпурсии ҷумҳурӣ иттилоъ дод, Зафар Файзуллозода аз ҳавзаи интихоботии Хатлон бидуни рақиб пешбарӣ шудааст.
Хотиррасон шуд, ки Ҳизби халқии демократии Тоҷикистон (ҲХДТ) судяи суди вилояти Суғд Мавлудахон Мирзозодаро аз ҳавзаи интихоботии №14-и ноҳияи Бобоҷон Ғафуров номзад ба вакилӣ дар палатаи поёнии парлумон пешбарӣ кард.
Рақиби Мавлудахон Мирзозода дар ин ҳавза Муқимҷон Саидов, мудири шуъбаи маъмурӣ-ҳуқуқии дастгоҳи раиси вилояти Суғд ба қайд гирифта шудааст, ки ҳамчун номзади худпешбаришуда дар интихобот иштирок мекунад.
Интихоботи мазкур ба ҷойи вакили хориҷшудаи палатаи поёнии парлумон аз ҳавзаи интихоботии №14-и ноҳияи Бобоҷон Ғафуров Мавлуда Қаландарзода ва узви палатаи болоии парлумон аз ҳавзаи интихоботии Хатлон Саидумрон Абдураҳмонзода доир мегардад.
Ёдрас мекунем, ки бинобар сабаби ба вазифаи раиси Суди олии иқтисодии ҷумҳурӣ таъин шудани Мавлуда Қаландарзода ва таъини Саидумрон Абдураҳмонзода ба мансаби муовини раиси Кумитаи ҳифзи муҳити зист, ваколатҳои онҳо дар палатаҳои парлумон қатъ гардиданд.
