Корҳои беҳбуди вазъи роҳи мошингарди Душанбе – Қӯрғонтеппа баъди аз ҷониби парлумон маъқул шуморидани кумаки Бонки осиёгии рушд (БОР) оғоз мегарданд. Палатаи поёнии парлумон бояд созишномаи молиявии қаблан миёни ҳукумати Тоҷикистон ва БОР баимзорасидаро тасдиқ намояд.
Ҳанӯз аввали моҳи ноябри соли гузашта БОР ҷудо кардани 65,2 млн. доллари ИМА қарз ва грант ба Тоҷикистон барои беҳбуди вазъи роҳ байни Душанбе ва Қӯрғонтеппаро маъқул донист.
Дар марҳилаи аввали амалисозии лоиҳа вазъи ҳудуди 33 километр роҳ аз Душанбе то Чашмасорон беҳтар карда шуда, роҳ то чор хати ҳаракат васеъ, рӯйпӯши роҳ беҳтар ва дар тамоми фосилаи роҳ аломату воситаҳои таъмини бехатарии ҳаракат дар роҳ насб мегарданд.
Аммо корҳои бевоситаи амалисозии лоиҳа то ҳол шурӯъ нашудааст, зеро санади молиявии имзошударо бояд парлумони Тоҷикистон тасдиқ кунад.
«Барои сарфаи вақт мо баъзе корҳои пешакӣ оид ба бастани қарордодҳоро оғоз намуда, тендер эълон шуд, – гуфтанд ба «Азия-Плюс» дар намояндагии доимии БОР дар Тоҷикистон. – Баъди аз ҷониби парлумон тасдиқ шудани созишнома, паймонкор ва мушвири лоиҳа интихоб мешаванд».
Дар намояндагӣ бар ин назаранд, ки ин ҷо ҳеҷ мушкилоте вуҷуд надошта, бо тасдиқи созишнома амалисозии лоиҳа ба гумони ғолиб соли равон шурӯъ мешавад.
Мутахассисони БОР чунин мешуморанд, ки беҳбуди вазъи ин роҳ ба ташкили долони иқтисодӣ миёни пойтахти Тоҷикистон ва Афғонистон мусоидат менамояд, зеро ин роҳ қисмате аз роҳи стратегӣ миёни минтақаҳои шимолу ҷануби кишвар, яке аз роҳи бештар мавриди истифода қарордошта ва қисмате аз долонҳои 2, 5 ва 6-и барномаи Ҳамкории минтақавии иқтисодии Осиёи Марказӣ (ЦАРЭС) мебошад.
Маблағгузории БОР аз 49,4 млн. доллари ИМА қарзи имтиёзнок ва 15,8 млн. доллари ИМа грант иборат буда, ҳамчунин БОР маблағгузорӣ ба грант дар ҳаҷми 2 млн. доллари ИМА аз Фонди бисёрҷонибаи энергияи тоза дар доираи Барномаи шарикӣ оид ба маблағгузории энергияи тозаро ба дӯш мегирад.
Ҳукумати Тоҷикистон маблағгузории шарикӣ дар ҳаҷми 17,2 млн. доллари ИМА-ро пешниҳод намуда, Фонди ОПЕК (Созмони кишварҳои содиркунандаи нафт) ба маблағи 112 млн. доллари ИМА қарз ҷудо мекунад. Вазорати нақлиёт агентии иҷрокунандаи лоиҳа аст. Анҷоми амалисозии лоиҳа соли 2021 пешбинӣ шудааст.
Аввали моҳи марти соли равон Президенти Тоҷикистон Эмомалӣ Раҳмон бо сафари корӣ ба ноҳияи Хуросони вилояти Хатлон ташриф оварда, дар ин ҷо ба Пешвои миллат лоиҳаи азнавсозии роҳи мошингарди “Душанбе – Қӯрғонтеппа” муаррифӣ гардид. Зикр гардид, ки тибқи лоиҳа марҳилаи 1 – уми азнавсозии ин роҳ, ки 33, 2 километрро ташкил медиҳад, бо харҷи 96 миллион доллар маблағҳои грантӣ ва қарзи Бонки Осиёии Рушд бояд бунёд шавад.
