Ҷамъияти саҳҳомии пӯшидаи Бонки сармоягузории “Конт” дар Тоҷикистон, ки ба миллиардери эронӣ Бобаки Занҷонӣ мансуб медонанду дар Эрон ба қатл маҳкум шудааст, табдили ном кард. Акнун ин бонк «Бонки Осиё» ном гирифт.
Бино ба маълумоти дафтари матбуоти Бонки миллии Тоҷикистон (БМТ), бо қарори Раёсати БМТ ба ҶСП “Бонки Осиё” барои анҷом додани амалиёти бонкӣ бо пули миллӣ ва асъори хориҷӣ иҷозатнома дода шуд.
Дар БМТ шарҳ доданд, ки дар қарори зикршуда табдили номи бонки «Конт» ба «Бонки Осиё» дар назар дошта шуда, дар мақомоти раҳбарии бонк, сохтор ва ҳайати шахсии он ягон тағйироте сурат намегирад.
Қобили зикр аст, ки тайи солҳои ахир Бобаки Занҷонӣ яке аз сармоягузорони бештар мавриди баҳс дар Тоҷикистон қарор гирифт. Ӯро саҳмиядори аввали холдинги «Конт-групп Тоҷикистон» мешуморанд, ки ширкатҳои ҷудогонае чун «Asian Express Terminal», «Конт — Таъминот», «Конт-Турист», «Asian Express Airline» и «Конт-сохтмон»-ро муттаҳид месозад.
Зимни нишасти хабарии аавали соли 2015 раиси Кумитаи давлатии сармоягузорӣ ва идораи амволи давлатии Тоҷикистон Қодири Қосим изҳор намуда буд, ки тоҷири маъруфи эронӣ Бобаки Занҷонӣ дар Тоҷикистон ҳеҷ амволе надорад ва дар маросими ифтитоҳи Asian Express Terminal дар Душанбе на ба сифати сармоягузор, балки меҳмони фахрӣ иштирок кардааст.
Бобаки Занҷонӣ 30-юми декабри соли 2013 дар Эрон боздошт шуд. Ҳукуматдорони Эрон ӯро ба азхудкунии 2 млрд. 60 млн. еврои мутааллиқ ба Вазорати нафти Эрон муттаҳам медонанд.
Моҳи марти соли 2016 суди Эрон Бобаки Занҷониро ба ҳукми қатл маҳкум кард, вале иҷрои ҳукми соҳибкори 42-солаи эронӣ, ки дороиаш 14 млрд. доллар арзёбӣ мешуд, ба таъхир гузошта шуд. Ҳукми Занҷонӣ баъди ба давлат баргардонидани пулҳои дуздидааш ба иҷро расонида мешавад.
