Аз 4 то 7-уми апрели соли 2017 дар машқгоҳи “Чоруқ-Дарон”-и гарнизони Суғд машқҳои муштараки баталионӣ-тактикии зидди террористӣ, бо тирпарронии ҷангӣ доир карда мешаванд.
Тавре сардори Маркази матбуоти Вазорати мудофиаи ҶТ полковник Фаридун Маҳмадализода хабар дод, машқҳои муштарак дар асоси нақшаи ягонаи тайёрии ҷангӣ, таҳти роҳбарии Ситоди генералии Қувваҳои Мусаллаҳи Ҷумҳурии Тоҷикистон доир гардида, он дар се марҳилла ба таври назариявию амалӣ ташкилу ба роҳ монда мешавад.
Дар машқҳои муштараки баталионӣ-тактикии зиддитеррористӣ, ҷузъу томҳои Қӯшунҳои хушкигард ва ҳайати шахсии сохторҳои қудратии мамлакат, ки дар гарнизони Суғд мустақаранд, ширкат намуда, силоҳу муҳимоти мухталифи оташфишон, авиатсияи ҷангӣ ва техникаҳои зиреҳпӯши ҳарбиву артиллерӣ ва автомобилӣ истифода мегарданд.
Ҳадафи баргузории маҷмӯи машқҳои муштарак сайқал додани таҷрибаи ҳайати шахсии ширкаткунандагони машқҳоро дар ташкили амалиёти бомуваффақонаи ҷангӣ, ҳамоҳангии сохторҳои низомии мамлакат дар сурати ба вуқӯъ пайвастани хатарҳои эҳтимолӣ, баланд бардоштани қобилияти ҷангиву ҷисмонӣ ва сафарбарии қӯшунҳо дар самти доир кардани унсурҳои мухталифи ҷангии зиддитеррористӣ дар шароити дашту саҳро дар бар мегирад.
