Дар шаҳрҳои Душанбе ва Хуҷанд шашумин ярмарка-намоиши байналмилалии "Таҳсилоти русиягӣ. Душанбе – 2017" доир мегардад.
Бино ба маълумоти дафтари матбуоти намояндагии Россотрудничество, имсол дар ин чорабинӣ наздики 40 мактаби олии Русия иштирок карда, тоҷикистониён бо шароити таҳсил дар ин муассисаҳо тариқи муколама бо намояндагони мактабҳои олӣ шинос ва доир ба бастаи зарурии ҳуҷҷатҳои пешниҳодмешуда ҷиҳати довталабӣ барои дохил шудан ба онҳо машварат гирифта метавонанд.
Ҳадаф аз баргузории ярмарка-намоиш шиносоии хатмкунандагони макотиби таҳсилоти умумӣ ва олии Тоҷикистон бо самтҳо ва шароити таҳсил дар Русия, огаҳӣ аз дастовардҳо ва ҷалби таваҷчуҳи ҷомеа ба барномаҳои таълимии Русия, ташаккули фазои ягонаи иттилоотии таълимӣ дар паҳнои ИДМ унвон шудааст.
Дар Душанбе намоиш дар Донишгоҳи аграрии Тоҷикистон бо суроғаи хиёбони Рӯдакӣ, 146 рӯзи 13 апрел аз соати 10 то 17 ва рӯзи 14 апрел аз соти 9 то соати 17 баргузор мешавад.
Дар Хуҷанд намоиш дар Донишгоҳи давлатии ҳуқуқ, тиҷорат ва сиёсат (микрорайони 17, х.1) рӯзи 16 апрел аз соти 10 то соати 17 доир мегардад.
