Савдогарони нуқтаҳои фурӯш (киоскҳо)-и назди Маркази миллии тиббӣ (Қарияи Боло) мегӯянд, ба онҳо то 15 апрел муҳлат додаанд, то ки борашонро аз нуқтаҳо бароранд, зеро мувофиқи дастури ҳукуматдорон, ин нуқтаҳои фурӯш кӯчонида мешаванд.
Барои кӯчонидани нуқтаҳо ба қаламрави беморхона кран оварда шудааст. Ба савдогарон гуфтаанд, ба ҷойи 50 нуқтаи фурӯш ва киоски газетафурӯшӣ гулгашту гулзорҳо бунёд шуда, дорухонаҳо на ва нуқтаҳои фурӯши нав сохта мешаванд ва ҳамааш чун дар замони шӯравӣ мешавад.
Як намояндаи Маркази тиббӣ ба «Азия-Плюс» хабар дод, ки мушовири дастгоҳи ёвари президенти Тоҷикистон Абдуҷаббор Азизӣ рӯзи душанбе ба беморхона омада, дастур додааст, ки ҳамаи нуқтаҳои фурӯш то 15 апрел аз байн бардошта шаванд.
«Абдуҷаббор Азизӣ гуфт, ки қаламрави беморхона чун дар замони шӯравӣ мешавад, вале мо куҷо равем?, – мегӯянд савдогарон. – Ба иваз барои мо ҷой намедиҳанд ва мо корамонро аз даст медиҳем. Дорухонаҳоро ҳам аз байн мебардоранд, вале ба ҷойи он бинои муосир сохта, онҳо метавонанд боз дар он ҷо кор кунанд, лекин мо бекор мемонем».
Баҳри шарҳи масъала «Азия-Плюс» кӯшиш кард, ки бо Абдуҷаббор Азизӣ тариқи телефон тамос бигирад, аммо баъди огаҳӣ ёфтан аз масъалае, ки мо пурсиданӣ будем, ӯ гӯшаки телефонро гузошт.
Дар ҳукумати ноҳияи Сино, ки Маркази миллии тиббӣ дар қаламрави он ҷойгир аст, тасдиқ намуданд, ки ба онҳо доир ба аз байн бурдани ҳамаи нуқтаҳои фурӯш дар қаламрави беморхона дастури шифоҳӣ расидааст, аммо муовини аввали раиси ноҳияи Сино Ҳайдар Гулаҳмадов сабаби кӯчонибани нуқтаҳои фурӯшро шарҳ дода натавонист.
