Вазорати корҳои дохилии Тоҷикистон далели марги як нафарро назди бинои мақомоти шаҳрдории Душанбе рад мекунад.
«Чунин ҳодиса дар ВКД ба қайд гирифта нашудааст, – гуфт баъди се рӯзи ҳодиса сухангӯи вазорат Умарҷони Эмомалӣ. – Маълум нест, ки ин далелро аз куҷо пайдо карда бошанд».
Марди наздики 40-сола соати 16:30-и рӯзи 11 апрел гулӯи худро бурида, худкушӣ кард. Дар ин бора корбарони шабакаҳои иҷтимоӣ менависанд.
Тибқи баъзе маълумот, ӯ тариқи таксиҳои сесомонигӣ барои пешбурди рӯзгораш пул кор мекардааст, вале баъди манъи кори онҳо, маҷбуран корашро аз даст додааст.
Дар ҳамин маълумот гуфта мешавад, ҳамон рӯз ӯ ба мақомоти шаҳрдорӣ омадаааст, то ки бо ягон нафаре аз раҳбарияти шаҳрдорӣ вохӯрад, вале ба гапи мард гӯш надода, гӯё ӯро рондаанд.
Қобили зикр аст, ки ҳамон рӯз хабарнигори «Азия-Плюс» пас аз як соат (баъди бо телефон дар бораи ҳодиса ба мо хабар додани сокинони шаҳр) ба ҷойи ҳодиса рафта, вале ба ҷуз як гурӯҳи одамон дигар чизеро надид. Шоҳидон дар бораи ҳодиса чизе равшану фаҳмо гуфта натавонистанд. Лекин ба ҳар ҳол доир ба рух додани ҳодиса дар ин ҷо амали кормандони милитсия гувоҳӣ медоданд, ки ҳамаи роҳгузаронро пароканда мекарданд.
Чанде дуртар аз ҷойи ҳодиса автомашинаи обкашӣ (водовоз) қарор дошт, ки шояд бо ёрии он хунро тоза кардаанд. Сокинони аввалини ба мо хабардода зикр карда буданд, ки хун дар ин ҷо зиёд буд.
ИЗОБРАЖЕНИЕ Чанде дуртар аз ҷойи ҳодиса автомашинаи обкашӣ (водовоз) қарор дошт, ки шояд бо ёрии он хунро тоза кардаанд. Сокинони аввалини ба мо хабардода зикр карда буданд, ки хун дар ин ҷо зиёд буд.
Ёдрас мекунем, ки охири соли гузашта дар бораи аз 20 марти соли 2017 манъ кардани истифодаи воситаи нақлиёти бароришаш то соли 2008 манъ ва тадриҷан ивази маршруткаҳо ба автобусу троллейбусҳо қарор қабул карда шуд, ки ба таксиҳои сесомонӣ низ дахл дошт.
