Президенти Тоҷикистон Эмомалӣ Раҳмон имрӯз имрӯз қонунҳои қаблан дар палатаҳои парлумон тасдиқшуда «Дар бораи бехатарии сейсмикӣ», «Дар бораи санадҳои меъёрии ҳуқуқӣ», «Дар бораи сиёсати давлатӣ дар соҳаи саноат», «Дар бораи ҳимояи рақобат», Кодекси тандурустӣ ва тағйироту илова ба як қатор қонунҳои кишварро ба имзо расонид. Дар ин бора хадамоти матбуоти сарвари давлат хабар медиҳад.
Мутобиқи муқаррароти нахустин дар таърихи ҷумҳурӣ Кодекси тандурустии Тоҷикистон, ки 15 март онро палатаи поёнии парлумон маъқул шуморид, ба табибони ҷавони бидуни таҷрибаи кофӣ минбаъд ба фаъолияти хусусӣ машғул шудан манъ мешавад.
Зимни суханронӣ назди вакилони парлумон вазири тандурустӣ ва ҳифзи иҷтимоии аҳолии ҷумҳурӣ Насим Олимзода изҳор дошта буд, ки корҳои таҳияи Кодекс бо супориши президент ҳанӯз соли 2013 оғоз гардида буд.
Кодекси қабулшуда 16 қонуни қаблан қабулшуда дар танзими масоили соҳаи тандурустӣ дар Тоҷикистонро иваз мекунад. Кодекс масоили фаъолияти тибби давлатӣ, хусусӣ ва халқиро ба танзим медарорад.
Мувофиқи меъёрҳои Кодекси қабулшуда, табибони ҷавоне, ки таҷрибаи кофӣ надоранд, наметавонанд ба фаъолияти тиббии мустақилона (хусусӣ) машғул шаванд.
Вазири тандурустӣ он вақт зикр карда буд, ки имрӯз дар Тоҷикистон 601 субъект ба пешниҳоди хизматгузориҳои тибби хусусӣ машғуланд.
Дар робита ба тибби халқӣ дар Кодекс зикр мегардад, ки «ҷодугарӣ ва расму оинҳои динӣ тибби хусусӣ эътироф шуда наметавонанд».
