Агентии ҳамкории байнулмилалии Япония (JICA) баҳри амалисозии лоиҳаи «Беҳбуди Фурудгоҳи байнулмилалии Душанбе, марҳилаи 2» 356 млн. йен (ҳудуди 3,9 млн. доллар) маблағ ҷудо мекунад.
Бино ба маълумоти сомонаи Вазорати молияи ҶТ, рӯзи 31 май миёни Тоҷикистон ва Агентии ҳамкории байнулмилалии Япония (JICA) аз рӯи лоиҳаи «Беҳбуди Фурудгоҳи байнулмилалии Душанбе, марҳилаи 2» созишномаи грантӣ ба имзо расид.
Қобили зикр аст, ки барои амалисозии марҳилаи аввали лоиҳаи мазкур, ки созишномааш 29 сентябри соли 2014 ба имзо расида буд, JICA 1,9 млрд. йен (17 млн. доллар) маблағ ҷудо карда буд.
Ҳадаф аз амалисозии лоиҳа сохтмон ва насби таҷҳизоти зурурӣ барои терминали боркашонӣ ва афзоиши имконоти идоракунӣ ва қабули ҳавопаймоҳо дар Фурудгоҳи байнулмилалии Душанбе унвон мешавад.
Созишномаи дар боло зикршуда аз ҷониби вазири молияи Тоҷикистон Абдусалом Қурбониён ва роҳбари JICA дар Тоҷикистон Хидеки Танабе ба имзо расонида шуд.
