Улмас Ҷамол, шоир ва рӯзноманигори узбакзабони Тоҷикистон, ки аз ӯ шоири “зуллисонайн” ё дузабона ном мебаранд, дар 84-солагӣ дар манзилаш даргузашт.
Бино ба иттилои Радиои Озодӣ, наздиконаш гуфтанд, ки ӯ шаби 27-уми июн дунёро падруд гуфт.
Улмас Ҷамол зодаи шаҳри Ургути Самарқанд буда, ҳанӯз дар овони хурдсолиаш хонаводаи онҳо ба Сталинободи собиқ, ҳоло Душанбе, кӯчида буд. Ӯ бахши суханшиносии Донишгоҳи миллии Тоҷикистонро хатм карда, аз соли 1963 то 2012 дар нашрияи узбакзабони “Халқ овози” кор мекард.
Нахустин маҷмӯаи шеъраш соли 1969 чоп шудааст. Дар маҷмуъ, бист китоби ӯро нашр кардаанд.
Улмас Ҷамол чаҳор фарзанд ва ҳашт набера дошт. Духтараш Ҷамила, ки хабарнигору тарҷумон буд, соли 2014 даргузаштааст.
Ҳайати кормандони гурӯҳи расонаҳои “Азия-Плюс” ба пайвандону наздикони марҳум ҳамдардӣ изҳор намуда, барояшон аз даргоҳи Худованд сабри ҷамил хоҳонанд.
