Бо қарори раиси пойтахт Рустами Эмомалӣ иҷлосияи ёздаҳуми Маҷлиси вакилони халқи шаҳри Душанбе, даъвати панҷум рӯзи 24 июл дар толори мақомоти иҷроияи ҳокимияти давлатии шаҳри Душанбе, воқеъ дар хиёбони Рӯдакӣ даъват карда шуд.
Бино ба иттилои дафтари матбуоти мақомоти шаҳрдории пойтахт, дар рӯзномаи иҷлосия баррасии масъалаҳои ҷараёни татбиқи барномаҳо, нақша-чорабиниҳои мақомоти иҷроияи ҳокимияти давлатии шаҳри Душанбе дар соҳаи маориф ва навгониҳо дар ин самт ба нақша гирифта шудааст.
Ҳамчунин дар иҷлосия аз ҷараёни рушди иқтисодию иҷтимоии шаҳри Душанбе дар нимсолаи якуми соли 2017 натиҷагирӣ шуда, вазифаҳо барои нимсолаи дуюм муайян карда мешаванд.
Аз вакилони Маҷлис хоҳиш карда шудааст, ки то санаи баргузории иҷлосия дар ҳавзаҳои интихоботӣ бо интихобкунандагон вохӯриҳо баргузор намуда, аз натиҷаи онҳо ба гурӯҳи корӣ оид ба такмил додани масъалаҳои рӯзномаи иҷлосия пешниҳодҳои мушаххасро манзур намоянд.
