Ваколатдор оид ба ҳуқуқи инсон (Омбудсмен)-и Тоҷикистон Зариф Ализода ба рӯзноманигорон иттилоъ дод, ки чанд рӯз пеш аз собиқ фармондеҳи замони ҷанги шаҳрвандӣ Ғаффор Мирзоев, ки ба ҳабси абад маҳкум шудааст, мактуб гирифтааст. Номаро хоҳари собиқ генерал Ойиша Мирзоева ба ин ниҳод расонидааст.
Ба гуфтаи Ализода, дар мактуб Мирзоев вохӯрӣ бо намояндагони ин ниҳодро дархост намудааст. Ализода гуфт, ин вохӯрӣ моҳи сентябр доир мегардад.
Дар ҳамин ҳол, ӯ маълумот доир ба гуруснанишинӣ эълон кардани Ғаффор Мирзоевро рад карда, изҳор дошт, ки «ӯ аз то ба ҳукумат нарасидани мактубҳояш оид ба дархости бозбинӣ шудани парвандааш шикоят дорад, вале гуруснанишинӣ эълон накардааст».
Омбудсмен ҳамчунин маълумоти гӯё бо кумаки тиббӣ ва табибон таъмин набудани Ғаффор Мирзоеви маҳкумшударо низ нодуруст унвон кард.
