Ваколатдор оид ба ҳуқуқи инсон (Омбудсмен)-и Тоҷикистон Зариф Ализода мегӯяд, шаҳрвандони кишвар, ки аз Сурия ё дигар давлатҳои даргири амалиёти ҷангӣ ихтиёрӣ ба ватан бармегарданд, ба таври автоматӣ авф намешаванд.
«Шахсе, ки аз Сурия баргашт, танҳо дар ҳолате авф мешавад, ки агар мақомоти ҳифзи ҳуқуқ содир нашудани ҷиноят аз ҷониби ин шахсро муайян кунанд ва танҳо тафтишот нишон хоҳад дод, ки ин шахс дар озодӣ мемонад ё ба ҷавобгарии ҷиноӣ ҷалб мешавад», – гуфт Омубдсмен зимни нишасти хабарӣ.
Дар робита ба кӯдаконе, ки айни замон бо волидонашон дар Сурия қарор доранд, Ализода гуфт, нимсолаи аввали соли ҷорӣ ҳеҷ касе аз пайвандону наздикони кӯдакон ҷиҳати мусоидат барои ба ватан баргардонидани онҳо ба ин ниҳод муроҷиат накардааст.
Ба гуфтаи Ваколатдор оид ба ҳуқуқи кӯдакон Раҷабмоҳ Ҳабибуллозода, имрӯз 206 нафар кӯдакону наврасон аз Тоҷикистон дар минтақаи Шарқи Наздик қарор доранд.
Бино ба маълумоти СММ, 234 оилаи тоҷикистониён иборат аз 840 нафар айни замон дар қаламрави Сурия ва Ироқ ё дигар минтақаҳои низоъ ҳузур дошта, 309 нафарашон – мардон, 279 нафарашон – занон, 110 нафар – духтарони ноболиғ ва 142 нафар – писарони ноболиғ мебошанд.
Тибқи ҳамин маълумот, тайи ду соли охир (солҳои 2015-2017) ба ҳукуматдорони Тоҷикистон муяссар шудааст, ки 19 оила ё худ 61 нафарро аз минтақаҳои даргири ҷанг берун оваранд, ки миёни онҳо 21 духтари ноболиғ ва 20 писари ноболиғ ҳузур доштанд.
