Вазорати маориф ва илми Тоҷикистон бо қабули як қарор эълон доштааст, ки аз 1 сентябри соли равон дар тамоми муассисаҳои таҳсилоти миёна ва олии касбии шаҳри Душанбе дарсҳо аз соати 8:00 оғоз меёбанд.
Бино ба иттилои хабаргузории «Озодагон», қаблан бо пешниҳоди Маҳмадсаид Убайдуллоев, раиси вақти Душанбе қарор шуда буд, ки дар муассисаҳои таҳсилоти миёна ва олии касбии пойтахт дарсҳо аз соати 7:30 оғоз шаванд.
Тибқи иттилои Вазорати маориф ва илми Тоҷикистон 28-уми август бо қарори ҳайати мушовараи Вазорат реҷаи дарсӣ ба ҳолати муқаррарӣ баргардонида шуд.
Вазорати маориф далели ин тасмимашро ба коҳиши танбашавии нақлиёти автомобилӣ ва муътадил гардидани ҳаракати нақлиёти мусофирбари шаҳри Душанбе рабт додааст: “Машғулиятҳои басти дуюм дар муассисаҳои таҳсилоти миёна ва олии касбии шаҳри Душанбе тибқи реҷаи тасдиқгардида бетағйир боқӣ мондаанд”.
Ёдрас мекунем, ки моҳи ноябри соли 2015 Вазорати маориф ва илми Тоҷикистон дар мувофиқа бо ҳукумати ҷумҳурӣ дар бораи тағйири вақти оғози дарсҳо дар муаассисаҳои таҳсилоти олӣ ва миёнаи касбии шаҳри Душанбе қарор қабул кард. Мувофиқи ин қарор оғози дарсҳо дар ҳамаи макотиби олӣ, коллеҷ ва омӯзишгоҳҳои пойтахт ним соат пештар, яъне соати 7-у 30 дақиқаи субҳ муқаррар шуд.
