Омӯзгорони мактабҳо, литсейҳо, коллеҷҳо ва мураббиёни боғчаҳои вилоятҳои Самарқанд, Тошканд, Қашқадарё ва Ҷиззахи Ӯзбекистон ба ҷамъоварии пахта сафарбар шуданд. Соҳибкорон шикоят доранд, ки аз онҳо барои нарафтанашон ба пахтазорҳо пул меситонанд.
Бино ба иттилои сомонаи Бахши хабарии Осиёи Марказӣ, яке аз ин омӯзгорон ба шарти ифшо нашудани номаш гуфтааст, муаллимони мактаби онҳоро ба даҳ гуруҳ тақсим кардаанд ва ҳар гуруҳ ба навбат барои даҳ рӯз ба пахтачинӣ хоҳад рафт.
"Гуруҳи аввал субҳи имрӯз ба пахтазори ноҳияҳои Зафаробод ва Зомин сафарбар шуданд. Шаб ҳам онҷо мемонанд. Миёни онҳо занони то 50-55-сола низ ҳастанд, ки бо таксиҳои маҳаллӣ созиш кардаанд. Ҳар субҳ онҳоро ба пахтазор мебаранд ва шом бармегардонанд. Онҳо аз ҳисоби худ рӯзона барои роҳпӯлӣ 5-10 ҳазор сӯм харҷ мекунанд", – афзуд ӯ.
Ба гуфтаи ҳамсуҳбати мо, дар боғчаҳои ноҳияи Зомин аз ҳар гуруҳ як мураббигиро мегузоранд ва боқӣ ба пахтазорҳо сафарбар хоҳанд шуд.
"Моро монанди соли гузашта маҷбур карданд, забонхат бинависем, ки бо хоҳиши худ пахтачинӣ меравем. Зеро чанде пеш мақомот ваъда дода буданд, ки дигар коргаронро иҷборан ба пахтачинӣ намебаранд. Ин ваъда куҷо шуд?! Ҳама чиз мисли пешин аст. Ягон чиз тағйир наёфтааст", – гуфт як омӯзгор аз Ҷизах.
Соҳибкорони ӯзбек мегӯянд, кормандони ҳукуматҳои маҳал ба бозорҳо омада, дар сурати нарафтанашон ба пахтачинӣ аз онҳо пул талаб хоҳанд кард.
"Ба мо гуфтанд, ё пахтачинӣ меравед, ё 300-350 ҳазор сӯмӣ (ҳудуди 37-43 доллари ИМА) медиҳед. Мо наметавонем, савдоро гузошта, пахтачинӣ равем. Бинобар ин, пул медиҳем. Чанде пеш ман 300 ҳазор сӯм додам", – гуфт як соҳибкор аз Самарқанд.
