Як сайёҳи велосипедрони ӯзбекистонӣ ба Душанбе омад. Роҳбари ансамбли ӯзбекии «Регистон» Хурсанд Шерови 59-сола бо велосипед аз кишварҳои Роҳи бузурги абрешим боздид мекунад.
«Ман ба хонаам омадам, – гуфт ӯ ба хабарнигори «Азия-Плюс» — Ман зодаи шаҳри Турсунзодаам. Замони шӯравӣ дар Тошканд таҳсил карда, ҳамон ҷо дар кор мондам. Аз рӯи ихтисос овозхони операам. Ба велосипедронӣ аз соли 2008 шурӯъ намуда, аз соли 2013 ба сайру саёҳат оғоз кардам».
Ин сайру саёҳат бо велосипедро ӯ ба гиромидошти хотири ҳунарманд Муслим Магомаев анҷом медиҳад.
«Ман аз Маскав мустақиман ба Тоҷикистон омадам, – иброз дошт Шеров. – Ман кайҳо боз орзуи сафар ба Тоҷикистонро доштам ва ҳатто чандин маротиба назди сарҳад ҳам омада будам, вале ба убури он ва расидан ба дидору ёру дӯстон имкон надоштам», – мегӯяд ӯ.
Хурсанд Шеров аз беҳтар шудани муносибатҳои Тоҷикистону Ӯзбекистон, ки ба туфайли он боздид аз ватани таърихиаш муяссар гардид, хел шоду мамнун аст.
Дар марз Хурсанд Шеровро ҳамдеҳагону хешовандон ва дӯстонаш пешвоз гирифтанд. Ӯ ба мактаби хатмкардааш омада, консерти хурде баргузор намуд.
Имсол хатсайри Хурсанд Шеров бо масофаи 5 ҳазору 400 километр масири Роҳи бузурги абрешимро дар бар мегирад. Ҳамарӯза ӯ 250-300 километр масофаро тай мекунад. Бо ҳаловат аз табиати Тоҷикистон ӯ тамоми роҳ сурудхонӣ карда, таваҷҷуҳи мусофирону ронандагонро ба худ ҷалб мекунад. Дар Тоҷикистон ӯро ҳамсинфаш Актамҷон, сокини шаҳри Турсунзода ҳамроҳӣ мекунад.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
