Маҷлиси намояндагони Маҷлиси Олии Тоҷикистон имрӯз созишномаи қарзӣ аз рӯи лоиҳаи сохтмон ва муҷаҳҳазгардонии як қатор мактабҳои таҳсилоти умумӣ дар кишварро тасдиқ кард. Созишнома нимаи моҳи май байни Фониди Саудӣ ва Тоҷикистон ба имзо расида буд.
Вазири маориф ва илми Тоҷикистон Нуриддин Саид ба вакилони парлумон изҳор намуд, ки барои сохтмони 66 мактаби таҳсилоти умумӣ Фонди Саудӣ беш аз 35 млн. доллар қарзи имтиёзнок ҷудо мекунад.
Ӯ ҳамчунин зикр кард, ки муддати ду соли минбаъда дар ҷумҳурӣ аз ҳисоби буҷети давлатӣ ба маблағи умумии 418 млн. сомонӣ 124 мактаб сохта мешавад.
Вазир таъкид дошт, ки имрӯз дар саросари ҷумҳурӣ ҳудуди 4 ҳазор мактаби таҳсилоти миёнаи умумӣ фаъолият доранд, ки дар онҳо наздики 2 млн. нафар хонандагон таҳсил мекунанд.
Қобили зикр аст, ки айни замон наздики 30 фоизи мактабҳои таҳсилоти миёнаи умумии Тоҷикистон ба таъмири асосӣ ниёз доранд.
