Ба сарбозони оиладори хизмати ҳатмии ҳарбӣ дар Тоҷикистон минбаъд ҳар ним сол рухсатӣ пешбинӣ мешавад. Муддати то 1 моҳ онҳо метавонанд назди аҳли оилаи худ қарор дошта бошанд.
Палатаи поёнии парлумони ҷумҳурӣ имрӯз, 11 октябр дар ин хусус ба қонун «Дар бораи мақоми хизматчиёни ҳарбӣ» тағйироти дахлдор қабул кард.
Сардори Ситоди кулли Қувваҳои Мусаллаҳи ҶТ, муовини аввали вазири мудофиа Эмомалӣ Собирзода қайд кард, ки лоиҳаи тағйирот ба қонуни мазкур бо дастури роҳбари Дастгоҳи иҷроияи Президенти ҶТ Озода Раҳмон таҳия шудааст.
Мутобиқи ин тағйирот, ба сарбозони қаториву сержантҳо, ки никоҳи қонунӣ доранд, ҳар як шаш моҳи муддати хизмат мутаносибан ба рухсатии давомнокиаш аз 20 то 30 шабонарӯз ҳуқуқ дода шуда, харҷи роҳкироро қисми низомӣ пардохт мекунад.
Собирзода қайд кард, ки ба хотири кам кардани хароҷот, тадбире пешбинӣ шудааст, ки мувофиқи он хизматчиёни ҳарбии оиладор бояд дар ҳудуди то 100 километр аз назди хонаашон адои хизмат кунанд.
Ӯ таъкид дошт, ки бар асоси фармони вазири мудофиа, сарбозони оиладор ва хизматчиёни ҳарбӣ ҳамчунин ҳар моҳ ду маротиба ба озод будан аз хизмат ҳуқуқ доранд.
Ғайр аз ин, гуфт муовини аввали вазири мудофиа, дар ҳар як қисми низомӣ ҳуҷраҳои дидор вуҷуд доранд, ки муддати як шабонарӯз ҳамсарони хизматчиёни ҳарбӣ бо шавҳарони худ дар он зиндагӣ карда метавонанд.
Номбурда зикр кард, ки дар сурати таваллуди фарзанди дуюм, сарбозони хизмати ҳатмии ҳарбӣ аз хизмат озод мешаванд, зеро мувофиқи қонунгузории амалкунанда, шаҳрвандони дорои ду фарзанд аз хизмати ҳарбӣ озоданд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
