Ба муносибати 23-юмин солгарди ҷашни Рӯзи Конститутсияи Тоҷикистон дар шаҳри Душанбе пойгаи аспдавонӣ доир мегардад.
Тибқи қарори раиси пойтахт Рустами Эмомалӣ, мусобиқаи кушоди пойгаи аспдавонӣ нимаи дуюми рӯзи 5 ноябр дар Муассисаи давлатии «Наврӯзгоҳ»-и шаҳри Душанбе баргузор карда шавад.
Ба Сарраёсати молияи шаҳри Душанбе дастур дода шудааст ки аз ҳисоби воситаҳои озоди буҷети шаҳрӣ барои пардохти хароҷоти мусобиқа 48 ҳазор 700 сомонӣ маблағ ҷудо намояд.
Қайд мешавад, ки ин чорабинӣ бо мақсади рушду равнақи варзиш, таъмини оммавияти варзишу солимгардонӣ, фароҳам овардани имконоти фароғату истироҳати сокинони пойтахт ва ташвиқу тарғиби пойгаи аспдавонӣ дар ҷумҳурӣ гузаронида мешавад.
Раиси пойтахт дар қарор ба ҳамаи сохторҳои марбутаи шаҳр дастур додааст, ки ҷиҳати дар сатҳи зарурӣ таъмин кардани баргузории мусобиқа тадбирҳои зарурӣ андешанд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
