Ҳаҷми қарзи хориҷии Тоҷикистон ба аввали соли равон ба 2,9 млрд. доллар расид, ки ба 40,3 фоизи Маҷмӯи маҳсулоти дохилӣ (ММД)-и ҷумҳурӣ баробар аст.
Вазири молияи ҷумҳурӣ Файзиддин Қаҳҳорзода зимни нишасти хабарӣ изҳор дошт, ки давоми соли ҷорӣ Тоҷикистон аз хориҷи кишвар ба маблағи 200 млн. доллар қарз дарёфт карданист.
«Қарзҳоро мо асосан аз ниҳодҳои молиявие, ки шарикони доимии кишвар мебошанд, дарёфт мекунем. Имконоти молии кишвар ҷиҳати саривақт ва пурраи иҷрои уҳдадориҳо аз рӯи қарзҳои ҷалбшуда имкон медиҳанд», – гуфт вазир.
Зимнан таъкид шуд, ки соли гузашта ба пардохти қарзи асосӣ ва фоизҳои он 147 млн. доллар маблағ равона гардидааст.
Қарздиҳандаи асосии Тоҷикистон айни замон Чин (Бонки содиротиву воридотии Чин) мебошад, ки ҳаҷми он наздики 1,2 млрд. долларро ташкил медиҳад. Қарзҳо аз фурӯши коғазҳои қиматноки давлатӣ дар бозорҳои байнулмилалӣ 500 млн. долларро ташкил медиҳанд.
Ҳамчунин Тоҷикистон аз Бонки ҷаҳонӣ (318 млн.), Бонки осиёгии рушд (278 млн.) ва Бонки исломии рушд (112 млн. доллар) низ қарздор аст.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
