– Даъвати навбатии президенти Афғонистон дар бораи оғози гуфтушунидҳо бо ҳаракати «Толибон» дар худи Афғонистон аз ҷониби толибон нодида гирифта мешавад, – изҳор дошт ба «Азия-Плюс» коршиноси масоили Афонистони муосир Қосим Бекмуҳаммад.
Бино ба гуфтаи ӯ, ҳаракати «Толибон» ба хубӣ медонад, ки ҳукумати Ашраф Ғанӣ заъифу нотавон буда, бисёре аз минтақаҳои Афғонистонро таҳти назорат надорад.
«Мухолифатҳои доимӣ бо сиёсатмадорони шинохтаи кишвар аз зумраи Абдулло Абдулло, Абдурашид Дӯстум, Салоҳуддин Раббонӣ, Ато Муҳаммад, Муҳаммад Муҳаққиқ ҳукумати ӯро боз ҳам заифтар мекунад. «Толибон» ба хубӣ медонанд, ки ҳукумати Ғанӣ дар Кобул бо дастгирии артиши НАТО нигаҳдорӣ мешавад ва агар онҳо кишварро тарк кунанд, тасарруфи кишвар аз ҷониби толибон душвор нест», – мегӯяд коршинос.
Бекмуҳаммад мутмаин аст, ки талошҳои дастаи Ашраф Ғанӣ бобати оғози раванди сулҳу созиш бо «Толибон» бидуни назардошти манфиатҳои бозигарони асосии мушкилоти Афғонистон дар симои Вашингтону Маскав, Пекину Теҳрон ва Деҳливу Исломобод ҳеҷ самаре ба бор намеорад.
«Аз ташаббуси нави Ғанӣ бобати созиш бо толибон ҳеҷ касе хушбин нест, зеро ҳаракати «Толибон» чандин маротиба изҳор намуда буд, ки онҳо танҳо бо ИМА ба гуфтушуниди сулҳомез омодаанд, на бо дастнишондаи онҳо дар Кобул», – таъкид дошт коршинос.
Ёдрас мекунем, ки президенти Афғонистон Ашраф Ғанӣ дар нишасти нахустини "Kabul process" пешниҳод кард, ки ҳамчун як бахши раванди сулҳу созиш, Толибон гурӯҳи қонунии сиёсӣ эътироф шавад. "Толибон ва ҳамаи аъзои гурӯҳ, тасмим бо шумост. Сулҳро бипазиред, дар гирди мизи гуфтушунид ҷамъ шавед ва биёед Афғонистонро якҷо бисозем", – гуфт Ашраф Ғанӣ.
Бино ба иттилои сомонаи Бахши хабарии Осиёи Марказӣ, вай ба Толибон пешниҳод кард, ки гуфтугӯҳои сулҳ бояд бо назардошти дастовардҳо, манфиати миллӣ, Қонуни асосӣ ва ҳифзи ҳуқуқи занон оғоз шавад. Ғанӣ ҳамчунин ба ҷангҷӯён оташбас, озодии зиндониҳо, шиноснома, дафтари корӣ дар Кобул ё минтақаҳои дилхоҳи дигар ва лағви таҳримҳоро пешниҳод кард.
Толибон пешниҳоди ҳукумати Афғонистонро бо сардӣ пазируфтанд. Дар изҳороти толибон омадааст, то замоне, ки нерӯҳои хориҷӣ дар кишвар ҳузур доранд, гуфтугӯ бо ҳукумат натиҷаовар нахоҳад буд.
