Дар остонаи сафари президенти Ӯзбекистон Шавкат Мирзиёев ба Тоҷикистон президенти Тоҷикистон Эмомалӣ Раҳмон ҷиҳати ба боғи «Низомиддин Алишер Навоӣ» иваз намудани номи боғи «50-солагии ҷавонон», воқеъ дар кӯчаи Беҳзоди шаҳри Душанбе амр ба имзо расонид.
Бино ба иттилои хадамоти матбуоти сарвари давлат, дар асоси амри мазкур раиси шаҳри Душанбе бояд барои ба боғи «Низомиддин Алишер Навоӣ» иваз намудани номи боғи «50-солагии ҷавонон» ба Маҷлиси вакилони халқи шаҳри Душанбе пешниҳод манзур намояд.
Гуфта мешавад, тибқи дастури дигари Президенти мамлакат, дар ин боғ пайкараҳои Нуриддин Абдураҳмони Ҷомӣ ва Низомиддин Алишер Навоӣ ҳамчун рамзи дӯстии халқҳои Тоҷикистон ва Ӯзбекистон гузошта мешавад.
Ба роҳбарияти мақомоти ҳокимияти давлатӣ дар шаҳри Душанбе дастур дода шудааст, ки барои таҳияи лоиҳаи муҷассамаҳои мутафаккирони номбурда озмун эълон намояд.
Ёдрас мекунем, ки моҳи феврали соли равон дар бораи дубора барқарор кардани пайкараҳои Алишери Навоӣ ва Абдураҳмони Ҷомӣ, ки соли 2009 барканда шуда буд, маълумот мунташир шуд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
