Зарфи ду рӯзи даҳаи дуюми моҳи март дар кишвар ҳавои боронӣ дар назар дошта шуда, дар кӯҳҳо барфи тар ва дар водиҳо боронҳои селосо меборанд.
Бино ба иттилои Кумитаи ҳолатҳои фавқулода, аз 11 то 13-уми марти соли равон дар водиҳо боронҳои селосо ва ва дар минтақаҳои кӯҳии кишвар дар баландиҳои беш аз 2000 метр (ғайр аз қаламрави ВМКБ) барфи шадиду тар вазъро печида мекунанд.
Гуфта мешавад, дар рӯдхонаҳо хатари болоравии сатҳи об боқӣ монда, дар роҳҳои кӯҳии ҷумҳурӣ лағзиши тарма, ярч ва резиши санг аз эҳтимол дур нест.
«Аз ин рӯ, Кумитаи ҳолатҳои фавқулодда аз аҳолии кишвар хоҳиш мекунад, ки ҳангоми истифода аз роҳҳои кӯҳӣ эҳтиёт кунанд, воситаи нақлиётии худро қабл аз сафар омода созанд, то ҳадди имкон аз сафарҳои бидуни зарурат ба манотиқи хафноки кӯҳӣ, корҳои саҳро, омода намудани ҳезум ва рафтан ба шикоргоҳ ба нияти шикор худдорӣ варзанд», – омадааст дар маълумоти Кумита.
Ба сокинони кишвар огоҳӣ дода мешавад, ки ҳангоми гаштугузор дар кӯчаҳо аз зери хатҳои интиқоли барқ, дарахтон, пояҳои реклом ва дигар иншоотҳои хатарнок нагузаранд.
Аз ронандагон дархост мешавад, ки ҳангоми ҳаракат дар роҳҳои кӯҳӣ бештар эҳтиёткор бошанд ва суръати ҳаркати мошинро аз меъёр зиёд боло набаранд.
